İsveçdə ölkənin nüfuzunun möhkəmləndirilməsi üzrə xüsusi qrup yaradılacaq
Stokholm, 9 aprel, Nərgiz Cəfərli, AZƏRTAC
Dünyada İsveç haqqında məlumatların yayılması, mədəniyyət, təhsil, elm sahələrində beynəlxalq əməkdaşlığın qurulması ilə məşğul olan İsveç İnstitutu xaricdə ölkənin etimad dərəcəsinin artırılması üçün xüsusi qrup yaradacaq.
AZƏRTAC xəbər verir ki, strategiyanın bir hissəsi İsveçin ekoloji keçid və rəqəmsallaşmaya yönələn innovativ ölkə kimi tanıdılması ilə bağlıdır.
İsveç İnstitutunun məlumatına görə, ötən il xaricdə ölkə haqqında dərc edilən materialların sayı on faiz artıb. Bu nəşrlərin ən böyük hissəsi Quranın yandırılması hallarını diqqətdə saxlayan ərəb və türkdilli medianın payına düşüb. İnstitutun qənaətinə görə, Türkiyədə və Səudiyyə Ərəbistanında bununla bağlı dərc olunmuş informasiyaların təxminən 40 faizi Yaxın Şərq, Şimali Afrika və Türkiyənin bəzi bölgələrində İsveçlə bağlı daha mənfi imicin yaradılmasına dair fəaliyyətlərə həsr olunub. Bununla əlaqədar İsveç hökuməti ölkənin dünyada imicinin yaxşılaşdırılması ilə bağlı səylərin artırılmasının zəruri olduğunu hesab edir.
Xarici ticarət naziri Yohan Forssell də yeni strategiyanın lehinə çıxıb. O qeyd edib ki, 2023-cü ildə Yaxın Şərqlə ticarətin artmasına baxmayaraq, İsveçin nüfuzunun möhkəmləndirilməsinə ehtiyac var. “Mən özüm siyasi liderlər və sahibkarlar ilə görüşmək üçün regiona səfərlər etmişəm. Ticarətlə bağlı mənfi nəticələr gördüyümdən daha ciddi olacağını güman edirdim”, - deyə o qeyd edib.
Aprelin 11-də hökumətin bu məsələ ilə bağlı qərar verəcəyi gözlənilir.
Bölmənin digər xəbərləri
