İtaliya Prezidenti seçilən Sercio Mattarellanın and içib
Roma, 3 fevral, AZƏRTAC
Növbəti dəfə İtaliya Prezidenti seçilən Sercio Mattarellanın fevralın 3-də andiçmə mərasimi keçirilib.
AZƏRTAC xəbər verir ki, bununla da 80 yaşlı Sercio Mattarella növbəti 7 illik müddətə İtaliya Prezidenti vəzifələrinin icrasına başlayıb.
Xatırladaq ki, Sercio Mattarella ilk dəfə 2015-ci il yanvarın 31-də keçirilən səsvermədə 665 səs toplayaraq İtaliyanın 12-ci Prezidenti seçilib, fevralın 3-dən səlahiyyətlərinin icrasına başlayıb.
Cari il yanvarın 29-da Senatın üzvü olan 315 senator və 6 ömürlük senator, Nümayəndələr Palatasından 630 deputat və 20 inzibati rayondan 58 nümayəndədən ibarət 1009 üzvlü “Böyük Seçki Məclisi”ndə 983 seçicinin iştirak etdiyi səsvermənin səkkizinci turunda isə Sercio Mattarella 759 səs toplayaraq İtaliyanın 13-cü prezidenti seçilib. O, 1946-cı ildə respublika idarəetmə sisteminə keçən İtaliyada növbəti dəfə prezident seçilən ikinci şəxs olub. Sercio Mattarella, həmçinin ölkə tarixində prezident seçkilərində ən çox səs toplayan ikinci namizəd olub.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
