İtaliyada 4 bal gücündə zəlzələ olub
Roma, 3 oktyabr, AZƏRTAC
İtaliyada 4 bal gücündə zəlzələ qeydə alınıb.
AZƏRTAC xəbər verir ki, bu barədə İtaliyanın Geofizika və Vulkanologiya İnstitutu (INGV) məlumat yayıb.
Episentri Kampi Fleqrey şəhəri olan zəlzələnin ocağı 3 kilometr dərinlikdə yerləşib. Yeraltı təkandan sonra bir neçə ardıcıl afterşok qeydə alınıb.
Neapol şəhərində də hiss edilən zəlzələ əhali arasında təşvişə səbəb olub, yüzlərlə insan küçələrə axışıb. Hazırda dağıntı və tələfat barədə məlumat yoxdur.
Neapolun qərbində yerləşən Kampi Fleqrey şəhəri qədim vulkanik kraterlərdən ibarətdir. Bölgədə seysmik aktivlik son bir ildə və xüsusilə də ötən aylarda artıb.
Keçən həftə burada 80-dən çox yeraltı təkan baş verib ki, onlardan ən böyüyü 4,2 bal gücündə olub. Bölgənin son 40 ilin ən güclü zəlzələsi ilə sarsılmasından sonra vulkanik ərazidə püskürmə riski ilə bağlı narahatlıq artmaqdadır. Ən çox risk altında olan 7 regionda hazırda ən azı 360 insan yaşayır.
Bölgədə sonuncu dəfə ən uzun müddət davam edən seysmik aktivlik 1980-ci illərin əvvəllərində qeydə alınıb.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
