İtaliyanın Luiss Universitetində keçirilən konfransda Ulu Öndər Heydər Əliyevin əvəzsiz xidmətlərindən danışılıb
Roma, 5 may, AZƏRTAC
Azərbaycanın İtaliyadakı səfiri Rəşad Aslanov bu ölkənin nüfuzlu universitetlərindən olan Luiss Universitetində keçirilən “Həssas cəmiyyətlərdə idarəçilik və dayanıqlı investisiya” mövzusunda beynəlxalq konfransda iştirak edib.
AZƏRTAC xəbər verir ki, universitetin beynəlxalq əlaqələr üzrə prorektoru Raffaele Markettinin moderatorluğu ilə keçirilən konfransda səfir Rəşad Aslanov bu il 100 illik yubileyini qeyd etdiyimiz müasir Azərbaycan dövlətinin memarı, siyasi və dövlət xadimi Ümummilli Lider Heydər Əliyevin dövlət quruculuğu fəaliyyətinə həsr olunmuş “Dövlət quruculuğunda liderlərin tarixi rolu: davamlı inkişaf və inklüziv idarəetmə” mövzusunda çıxış edib. Səfir çıxışı zamanı ölkəmizin ötən əsrin 90-cı illərində müstəqilliyini bərpa etdikdən sonra qarşılaşdığı çətinliklər və çağırışlar, xüsusən də Ermənistanın hərbi təcavüzü və onun nəticələri, iqtisadi tənəzzül, sosial problemlər, xarici təzyiq və daxili çəkişmələr səbəbindən dövlətçiliyini itirməsi təhlükəsini yaşadığını bildirib.
Azərbaycan dövlətinin müstəqilliyi üçün ciddi sınaq dövründə xalqın iradəsi ilə hakimiyyətə gələn Ümummilli Lider Heydər Əliyevin başladığı və uğurla həyata keçirdiyi dövlət quruculuğu tədbirləri, hüquqi, iqtisadi və sosial islahatlar barədə konfrans iştirakçılarına məlumat verilib. Ulu Öndərin siyasi iradəsi, strateji düşünmə, etimad yaratma və mükəmməl idarəçilik qabiliyyətinə malik lider kimi bütün fəaliyyətini xalqının və dövlətinin maraqlarının təmin olunmasına yönəltdiyi vurğulanıb. Bildirilib ki, müstəsna liderlik bacarığına malik dövlət xadimi olan Ümummilli Lider Heydər Əliyevin daxili və xarici siyasəti bugünkü müasir, güclü və müstəqil Azərbaycan dövlətinin qurulmasını şərtləndirib. Hüquqi, iqtisadi, sosial, təhsil, mədəni və digər sahələrdə aparılan islahatlar Azərbaycan cəmiyyətinin rifahını təmin edib, Azərbaycanı yardım alan ölkədən, donor ölkəyə çevirib. Ulu Öndərin müəllifi olduğu və bu gün də Azərbaycan Prezidenti İlham Əliyev tərəfindən uğurla həyata keçirilən neft strategiyasının Xəzər dənizini beynəlxalq əməkdaşlıq üçün əlçatan etməklə yanaşı, hazırda Avropa ölkələrinin enerji təhlükəsizliyinin təmin olunmasına önəmli töhfə verdiyi qeyd edilib.
Vurğulanıb ki, müstəqil Azərbaycanın inkişaf tarixinin tədqiqi zamanı 90-cı illərlə hazırkı dövrü müqayisə etdikdə, ölkə başçısının bir lider kimi dövlət quruculuğunda oynadığı rolun nə dərəcədə əhəmiyyətli olduğunu görmək mümkündür.
Konfransda İtaliya, ABŞ, İsrail, Böyük Britaniya, Fransa, Hindistan, Mərakeş, Nigeriya və digər ölkələrdən olan elmi tədqiqatçılar və tələbələr iştirak ediblər. Səfir R.Aslanov iştirakçıların ölkəmizlə bağlı çoxsaylı suallarını da cavablandırıb.
Qeyd edək ki, Luiss Universiteti Bakıda İtaliya-Azərbaycan Universitetinin yaradılması üzrə ADA Universitetinin akademik əməkdaşlıq etdiyi İtaliyanın beş aparıcı universitetindən biridir.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
