İtaliyanın Sardiniya regionu Azərbaycanla əlaqələri genişləndirməkdə maraqlıdır
Sardiniya, 12 fevral, AZƏRTAC
Azərbaycanın İtaliyadakı səfiri Vaqif Sadıqov bu ölkənin Sardiniya regionuna səfəri çərçivəsində bir sıra görüşlər keçirib.
Regionun prezidenti Françesko Pilyiaru ilə keçirilmiş görüşdə Azərbaycan-İtaliya əlaqələri, TAP layihəsi, ölkəmizin enerji strategiyası, təhsil sistemi, Dağlıq Qarabağ münaqişəsi və digər mövzular ətrafında fikir mübadiləsi aparılıb. Səfir bildirib ki, ötən ilin iyulunda Prezident İlham Əliyevin İtaliyaya rəsmi səfəri münasibətlərimizin daha da inkişaf etməsinə öz töhfəsini verməkdədir. Xüsusilə səfər çərçivəsində qəbul olunmuş “Azərbaycan Respublikası ilə İtaliya Respublikası arasında strateji tərəfdaşlıq haqqında Birgə Bəyannamə” əməkdaşlığımızın genişləndirilməsi baxımından böyük əhəmiyyət kəsb edir.
Ermənistan-Azərbaycan, Dağlıq Qarabağ münaqişəsi ilə bağlı məlumat verən V.Sadıqov Ermənistanın hərbi təcavüzü nəticəsində torpaqlarımızın 20 faizinin işğal olunduğunu, 1 milyondan artıq soydaşımızın qaçqın və məcburi köçkün vəziyyətinə düşdüyünü diqqətə çatdırıb.
Avropanın enerji təhlükəsizliyi baxımından böyük əhəmiyyətə malik TAP layihəsindən danışan səfir bu layihənin Azərbaycanın beynəlxalq arenada mövqeyinin daha da güclənməsinə töhfə verəcəyini bildirib.
Səfər çərçivəsində Sardiniya regionunun Kalyari şəhərinin meri Massimo Zedda ilə keçirilmiş görüşdə V.Sadıqov Azərbaycanın sürətli iqtisadi inkişafı, ölkəmizdəki yüksək tolerantlıq mühiti barədə məlumat verib.
M.Zedda Azərbaycan ilə Sardiniya regionu arasında mədəni tədbirlərin təşkilini, ölkələrimizin ali təhsil müəssisələrinin və biznes dairələrinin əməkdaşlıq etmələrinin vacibliyini vurğulayıb. Azərbaycan ilə Sardiniya arasında oxşar ənənələrin olduğunu deyən mer xalçaçılıq sənətinin buna yaxşı nümunə olduğunu qeyd edib. Diqqətə çatdırıb ki, bu sahədə təcrübə mübadiləsinin həyata keçirilməsi, qarşılıqlı tədbirlərin təşkili mədəniyyətlərimizin təbliği istiqamətində səmərəli ola bilər.
Sardiniyanın Sənayeçilər İttifaqının prezidenti Alberto Skanu ilə keçirilmiş görüşdə regionun iş adamları da iştirak ediblər. Görüşdə səfir Azərbaycan iqtisadiyyatının inkişaf səviyyəsi, ölkələrimiz arasında iqtisadi əlaqələrin hazırkı vəziyyəti və biznes imkanları barədə məlumat verib. O, regionun prezidentini və biznes nümayəndələrini Azərbaycana səfərə və buradakı biznes mühiti ilə yaxından tanış olmağa dəvət edib.
Sonra yerli iş adamlarını maraqlandıran suallar cavablandırılıb.
Səfər zamanı Kalyari şəhərinin Ticarət Palatasının prezidenti Cankarlo Diedda ilə keçirilmiş görüşdə V.Sadıqov iki ölkə arasında iqtisadi əlaqələrin vəziyyətindən danışaraq bu əməkdaşlığın möhkəm siyasi münasibətlərə söykəndiyini bildirib. Diqqətə çatdırıb ki, Azərbaycanla münasibətlər quran İtaliya regionları sırasında Sardiniyanın da olması böyük əhəmiyyət daşıyır.
Azərbaycan haqqında məlumat verən səfir ölkəmizdə əsasən qeyri-neft sektorunun inkişaf etdirilməsinin prioritet istiqamətlərdən olduğunu söyləyib. Vurğulayıb ki, bu sırada infrastruktur, nəqliyyat, kənd təsərrüfatı, İKT, ətraf mühitin qorunması və turizm sahələri də önəmli yer tutur.
C.Diedda Azərbaycanla əlaqələrin inkişaf etdirilməsində maraqlı olduğunu, bir sıra sahələrdə, o cümlədən turizm sektorunda birgə tədbirlərin təşkilinin böyük əhəmiyyət kəsb etdiyini vurğulayıb.
Maqsud Dadaşov
AZƏRTAC-ın xüsusi müxbiri
Sardiniya
Bölmənin digər xəbərləri
