İzmirdə aramsız yağan leysan yağışları bir sıra fəsadlar törədib

14.12.2020 [11:17]
Çap et
A⁺ A^-

İstanbul, 14 dekabr, AZƏRTAC

Türkiyənin İzmir vilayətində artıq dörd gündür aramsız yağan leysan yağışları bir sıra fəsadlar törədib.

AZƏRTAC xəbər verir ki, şəhərin Menderes rayonunda dərəni keçməyə çalışan avtomobili güclü yağışlar səbəbindən artan su axını aparıb. Hadisə nəticəsində maşında olan beş nəfərdən üçü xilas edilib. Digər iki nəfərin axtarışları davam edir. Avtomobil hadisə baş verən yerdən 800 metr uzaqlıqda tapılıb.

İzmirin Karşıyaka rayonunda dəniz səviyyəsinin yüksəlməsi nəticəsində daşqın meydana gəlib. Hadisə zamanı bölgədə olan avtomobillər və bəzi evlərin həyətyanı sahələri sular altında qalıb.

Hazırda təbii fəlakətin fəsadlarının aradan qaldırılması istiqamətində işlər aparılır.

Günel Məlikova

AZƏRTAC-ın xüsusi müxbiri

İstanbul