Kamal Cəfərov: Artıq ənənəvi media yerini sosial mediaya verib, ictimai gündəmi insanlar müəyyənləşdirirlər
Strasburq, 22 iyun, AZƏRTAC
Əsl şüurlu seçim etmək imkanı olmayan demokratiya yoxdursa, onda sosial mediadakı seçimlərimizdə həqiqətən sərbəstikmi? Sosial media istifadəçiləri öz fikirlərini ifadə etmək üçün daha böyük məkana malik olsa da, daha az azadlığa sahibdirlər, çünki müəyyən çəkinmələr var. Onların üstünlükləri və seçimləri sosial media istifadəçilərinin ümumi razılaşdırılmış baxışı əsasında formalaşır. Bu məsələyə sosial və dini kontekst əlavə edilsə, daha mürəkkəb bir məsələ olacaq.
AZƏRTAC xəbər verir ki, bu fikirləri AŞPA-nın yay sessiyası çərçivəsində “Media azadlığı, ictimai etibar və vətəndaşların bilmək hüququ” adlı məruzə ətrafında aparılan müzakirələrdə çıxış edən Azərbaycan nümayəndə heyətinin üzvü Kamal Cəfərov söyləyib.
Deputat bildirib ki, artıq ənənəvi media yerini sosial mediaya verib və indi ictimai gündəmi insanlar müəyyənləşdirirlər. Bunun özünəməxsus üstünlükləri və mənfi cəhətləri var. Üstünlükləri aydındır. Mənfiləri isə demokratik dəyərlərimizə və demokratik qurumlarımızın işinə meydan oxuyan məsələlərdir. Saxta və yalan məlumatlar artıq ictimai məkanı zəbt edib. Həmçinin bu, hətta doğru olmasa da, insanların sensasiyalı xəbərlərə inanmağa meyilli olduqlarını göstərir.
Müzakirə olunan hesabata toxunan K.Cəfərov qeyd edib ki, bu hesabatda ənənəvi mediaya və onun azadlığına, eləcə də insanların bilmək hüququna diqqət yetirilib, halbuki, bu, dəqiq və vaxtında nəticələrə gətirib çıxarmaya bilər, çünki artıq ənənəvi dünyada yaşamırıq.
Diqqətə çatdırılıb ki, Kantın əxlaq fəlsəfəsinə görə, ağılı və rasional varlığı olduğuna görə hər bir insan hörmətə layiqdir. Məmnuniyyət axtardıqda və ya hər hansı bir ağrının qarşısını almaq istədikdə, həqiqətən sərbəst davranmırıq. Bioloji təyin edilmiş və ya sosial olaraq şərtləndirilmiş davranışlar həqiqətən də azad olmaq demək deyil.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
