Kamran Quliyev: “Neftçi”-“Qalatasaray” oyunu tarixə düşəcək
Bakı, 1 sentyabr, AZƏRTAC
“Qalatasaray” ilə rəqib olduğumuz üçün çox sevindik. Təəssüf ki, koronavirus pandemiyası səbəbindən bu qarşılaşma azarkeşsiz keçiriləcək.
AZƏRTAC xəbər verir ki, bu sözləri Bakının “Neftçi” futbol klubunun prezidenti Kamran Quliyev Türkiyənin “Bein Sports” telekanalına UEFA Avropa Liqasının II təsnifat mərhələsinin püşkünün nəticəsinə əsasən “Qalatasaray”a rəqib olmalarına münasibət bildirərkən deyib.
Klub prezidenti bildirib: “İki qardaş ölkənin ən böyük komandaları qarşı-qarşıya gələcəklər. Mükəmməl bir matç olacaq. İnanıram ki, bu görüş tarixə düşəcək. Hər iki komandanın oyundan əvvəl şansı 50-50-yədir. “Qalatasaray”ı evimizdə qəbul edəcəyik. Onların gücünə və tarixinə hörmət edirik, amma biz də 83 illik klubuq. Bu qarşılaşmadan gözləntilərimiz böyükdür. Turu keçmək istəyirik”.
Qeyd edək ki, sentyabrın 17-də “Bakcell Arena”da keçiriləcək “Neftçi”-“Qalatasaray” oyunu saat 20:00-da start götürəcək.
Bölmənin digər xəbərləri
