MƏDƏNİYYƏT
“Kanon və post-kanon müəllif incəsənəti” mövzusunda mühazirə-diskussiya keçirilib
Bakı, 26 oktyabr, Anara Axundova, AZƏRTAC
Oktyabrın 25-də Müasir İncəsənət Mərkəzində “Kanon və post-kanon müəllif incəsənəti” mövzusunda açıq mühazirə-diskussiya keçirilib. Tədbir Birləşmiş Rəssamlar Klubu nəzdində fəaliyyət göstərən Diskussiya klubunun mütəmadi görüşləri çərçivəsində baş tutub. Görüşün moderatoru qismində fəlsəfə elmləri doktoru, Memarlar İttifaqı və Rəssamlar İttifaqının üzvü Elçin Şamilli çıxış edib.
AZƏRTAC xəbər verir ki, “Azərbaycanın muğam musiqisində kanon və onun müasir interpretasiyası” və “Türk xalçasında kanon” mövzularında müzakirə olunan məsələlər iştirakçıların diqqətinə çatdırılıb. Bundan başqa, görüş əsnasında barokko memarlıq üslubunun spesifik dili, kanonların dağılması prosesi və İntibah dövrünün müəllif sənətinə çıxış, Matiss, Şaqal və alman ekspressionistlərinin timsalında XX əsrin avanqard cərəyanında ənənəvi kanonunun yenidən formalaşması məsələləri də müzakirə edilib.
Müasir İncəsənət Mərkəzinin bədii rəhbəri, Birləşmiş Rəssamlar Klubunun sədri rəssam Bəhram Xəlilov Diskussiya klubunun fəaliyyəti və məqsədləri barədə AZƏRTAC-ın müxbirinə danışıb.
Bədii rəhbər deyib: “Birləşmiş Rəssamlar Klubunun təşkilatçılığı ilə Müasir İncəsənət Mərkəzinin nəzdində çoxşaxəli klub fəaliyyəti Mərkəzin yarandığı ilk günlərdən - 2007-ci ildən həyata keçirilir. Məqsədimiz incəsənətin, yaradıcı, elmi və fəlsəfi tədqiqatların təbliği, adıçəkilən sahələrin auditoriya tərəfindən qavranılması səviyyəsinin yüksəldilməsi, bizi əhatə edən dünyanın mütərəqqi-müasir kontekstdə anlaşılması üzrə sərbəst simbiotik fikir mübadiləsinin aparılmasıdır”.
Bəhram Xəlilovun sözlərinə görə, Müasir İncəsənət Mərkəzi Azərbaycan Rəssamlar İttifaqı ilə əməkdaşlıq şəraitində məhz incəsənətin təbliği və həvəskarlardan tutmuş peşəkarlara, turistlərdən yerli sakinlərə qədər hər kəsin yaradıcılıq səviyyəsində sərbəst ünsiyyət qurması üçün təşkil olunub.
“Biz cəmiyyətimizin nümayəndələrinin yaradıcı düşüncəsi üçün ümumi, vahid platforma yaratmağa çalışırıq və fənlərarası multikultural tədqiqatları daha da inkişaf etdirməyi və dərinləşdirməyi planlaşdırırıq. Eyni zamanda, yaradıcı, daha çox alternativ incəsənət, memarlıq, musiqi və hər hansı digər qavrayış mövzularında müzakirələr təşkil edirik”, - deyə klubun sədri qeyd edib.
Elçin Şamilli Diskussiya klubunun iclaslarının necə təşkil edilməsindən də bəhs edib: “Bizim müzakirələrimiz həm təsviri sənətin peşəkar xadimləri, həm sənətşünaslar, müəlliflər, ifaçılar və digər sənət növlərinin nümayəndələri, həm də incəsənət və mədəniyyət məsələləri ilə maraqlanan hər kəs üçün nəzərdə tutulub”.
Elçin Şamillinin sözlərinə görə, klubun iclasları müzakirə formatında keçirilir. Əvvəlcə moderator və ya qonaq məruzəçi mühazirə oxuyur, bu zaman audio-vizual materiallar da nümayiş etdirilir. Sonra mövzunun bölmələrinə uyğun olaraq klubun daimi üzvləri və onun ziyarətçiləri müzakirəyə daxil edilir.
“Bizim görüşlərimiz arasındakı fərq müzakirələrin çevikliyi və müxtəlifliyidir. Bütün mövzular incəsənətin müxtəlif növləri - rəssamlıq, memarlıq, musiqi, teatr, kino, dizayn, moda və mədəniyyətin digər sahələri üzrə nəzərdən keçirilir”, - deyə klubun moderatoru bildirib.
Mədəniyyət və incəsənətin insana bir növ təcrübə və dərketmə azadlığı məkanı kimi ruhun daxili aləminə nüfuz etmək imkanı verdiyini qeyd edən Elçin Şamilli əlavə edib: “Peşəkarlar üçün bu, öz baxış və anlayışlarını bölüşmək, həmçinin opponentlərin mühakimələri vasitəsilə əks əlaqə yaratmaq imkanıdır. Tamaşaçılar, oxucular və dinləyicilər üçün isə sənəti qavramağın növbəti səviyyəsinə keçmək üçün bir fürsətdir”.