Karantin dövründə muzeydəki eksponatlarla əlaqədar 150-dən çox videosüjet hazırlayıb yaymışıq
Bakı, 8 aprel, AZƏRTAC
Dünyada tüğyan edən koronavirus (COVID-19) pandemiyası mədəniyyət müəssisələrinin də işinə təsir edib. İstiqlal Muzeyi yaz aylarında keçirilməsi nəzərdə tutulan tədbirləri təxirə salmalı olub. Lakin muzey müasir informasiya texnologiyalarının yaratdığı imkan çərçivəsində öz işini davam etdirir.
Muzeyin direktor əvəzi Sədi Mirseyibli karantin günlərində görülən işlər barədə AZƏRTAC-ın müxbirinə məlumat verib: “Əsas işimizi onlayn rejimində aparırıq. Onu da deyim ki, Cəbrayıl Rayon Tarix-Diyarşünaslıq Muzeyi və Ağdamdakı R.Məmmədov adına Döyüş Şöhrəti Muzeyinin eksponatları da bizim muzeydə yerləşir. Karantin müddətində muzeydə və fondda saxlanılan eksponatlarla əlaqədar 150-dən artıq videosüjet hazırlayıb sosial şəbəkələrdə, eləcə də “Instagram” platforması üzərindən paylaşmışıq. Həmin videosüjetlər arasında XX əsr Azərbaycan ictimai fikrinin aparıcı simalarından olan Əli bəy Hüseynzadənin şəxsi kolleksiyasına aid olan eksponatlara həsr olunan süjet daha çox maraq doğurub. “Bir eksponatın tarixçəsi” silsiləsindən hazırlanan bir-iki dəqiqəlik süjetlər də çox maraqla baxılır. Həmin silsilədən olan süjetlər sırasında Səttarxan ordeninə, tank briqadasının komandiri, general-mayor Həzi Aslanova Sovet İttifaqı Qəhrəmanı adının verilməsi barədə sənədə, tanınmış rəssamlar Böyükağa Mirzəzadə, Nadir Qasımov, Altay Hacıyev, Əşrəf Heybətov və Sabir Çopurova həsr olunan videoxronikaları qeyd etmək istəyərdim. Yaxın günlərdə Nobel qardaşları haqqında, Əzim Əzimzadənin İkinci Dünya müharibəsinə həsr etdiyi karikaturalarına və ilk kosmonavt Yuri Qaqarinin İstiqlal Muzeyində saxlanılan əlyazmasına həsr olunan videoroliklər hazırlayıb Mədəniyyət Nazirliyinin museum.az saytında yerləşdirəcəyik.
Əslində evdə qalmaq qaynar iş günlərində çatdıra bilmədiyin işləri həyata keçirmək üçün bir fürsətdir. Bu barədə danışan muzeyin direktor əvəzi deyib: “Yaranmış imkandan istifadə edərək “Qabusnamə”ni növbəti dəfə oxuyuram. Hazırda tarixçi-alim Mehman Süleymanovun “Gülüstan müqaviləsi” kitabını mütaliə etməklə məşğulam. Sovet dövründə çəkilmiş milli filmləri və müasir serialları izləyirəm. Orta məktəbdə oxuyan qardaşım uşaqları Nihad və Nurayın dərsləri, onların təhsil sahəsində əldə etdikləri biliklərlə müntəzəm maraqlanıram. Dərslərdən əlavə hər gün onlarla bir yerdə testlər həll edir, nağıl və digər folklor nümunələri oxuyuruq. Özüm isə müxtəlif ölkələrin kağız və metal pullarından nümunələr toplayıram. Artıq şəxsi kolleksiyamda 70-ə qədər dövlətin pulları var. Xüsusi karantin rejimi günlərində həmin kolleksiyanı səliqə-sahmana saldım”.
Onun dediyinə görə, qlobal pandemiya ilə əlaqədar dünyada yaranmış vəziyyət hər kəsi narahat edir. Lakin həkim və mütəxəssislərin dediyi kimi, onun minimal itkilərlə sovuşması həm də biz insanlardan və sosial izolyasiya tədbirlərindən asılıdır: “Qoyulan qaydalara nə qədər dəqiq və düzgün əməl etsək, təmas və sıx əlaqələrdən nə qədər uzaq olsaq, gözəgörünməz düşmənlə müharibədə o qədər tez səmərə əldə etmək olar. Ona görə də hər kəs Prezident İlham Əliyevin və Birinci vitse-prezident Mehriban Əliyevanın xalqa ünvanladığı müraciətə, Nazirlər Kabineti yanında Operativ Qərargahın müəyyən etdiyi qaydalara uyğun şəkildə yaşamalı və bir vətəndaş olaraq qlobal fəlakətin tezliklə ötüb keçməsinə çalışmalıdır”.
Bölmənin digər xəbərləri
