Keçən həftə dünyada koronavirusa yoluxma hallarının sayında 10 faiz artım müşahidə edilib
Bakı, 18 mart, AZƏRTAC
Ümumdünya Səhiyyə Təşkilatının (ÜST) ekspert komissiyası, koronavirusa qarşı daha biri vaksini - Johnson & Johnson tərəfindən istehsal olunan Janssen preparatının istifadəsini tövsiyə edir. AZƏRTAC BMT-nin Xəbərlər xidmətinə istinadla xəbər verir ki, AstraZeneca / Oxford vaksininə gəldikdə, mütəxəssislər trombozun vaksinasiyanın fəsadı deyil, COVID-19 simptomu olduğunu hesab edirlər, lakin vəziyyəti araşdırmağa davam edirlər.
ÜST mütəxəssisləri Johnson & Johnson vaksininin sınaqlarında 44 min insanın iştirak etdiyini bildirib: plasebo alan 22 mindən on nəfərdə tromboz aşkar edilib. Vaksin alan 22 mindən 14 nəfərdə tromb əmələ gəlib. "Bu, təxminən eyni şeydir, statistik olaraq bu fərq cüzidir", - deyə komissiyanın nümayəndəsi doktor Annelis Valder-Smit qeyd edib.
Xatırladaq ki, bundan əvvəl AstraZeneca şirkətinin istehsal etdiyi preparatı - COVID-19-a qarşı başqa vaksini almış avropalılar arasında az sayda tromboz hadisəsinin baş verdiyi məlum oldu. Söhbət bu preparatın Avropada istehsal olunan iki partiyasından gedir. Bundan sonra bir sıra Avropa ölkəsinin rəhbərləri araşdırmanın nəticələri məlum olana qədər bu vaksinin istifadəsinin dayandırılması barədə qərar qəbul ediblər.
ÜST ekspertləri tromboz hadisələri və AstraZeneca preparatı ilə vaksinasiya arasında əlaqənin hələ ki, təsdiqlənmədiyini vurğulayırlar, lakin məsələ hələ də araşdırılır: ÜST vaksinasiya nəticəsində yaranan ağırlaşmalarla bağlı bütün məlumatlara çox ciddi yanaşır.
Doktor Valder-Smitin sözlərinə görə, vaksinlərin klinik sınaqları üçün tromboz riski daha yüksək olan insanlar seçilirdi. "COVID-19, hiperkoagulyasiya (qanın laxtalanma sisteminin yüksək fəallığı) müşahidə olunan insanlar üçün xüsusilə təhlükəlidir - xəstəliyin bir çox ağır keçməsi və ölüm halları məhz tromboembolizmlə əlaqədardır", - deyə o bildirib.
ÜST bu gün ən böyük təhlükənin vaksinasiya ilə əlaqəli mümkün fəsadlar deyil, bir sıra ölkələrdə dərmanlara çıxışın mövcud olmaması olduğunu xüsusi qeyd edib. Bundan əlavə, ümumilikdə, ictimai rəy sorğularının nəticələrinə görə, dünya əhalisinin yalnız 65 faizi COVID-19 əleyhinə peyvənd olunmağa hazırdır. Lakin, Ümumdünya Səhiyyə Təşkilatı ekspertlərinin qeyd etdiyi kimi, bu göstəricilər ölkədən və bölgədən asılı olaraq əhəmiyyətli dərəcədə fərqlənir. Vaksinasiya etmək istəməməyi, bir qayda olaraq, vaksinlər haqqında şayiələrin və təhrif edilmiş məlumatın yayılmasından irəli gəlir.
Ötən həftə (8-14 mart) dünyada koronavirusun yeni hallarının artması ilə yadda qaldı - bu göstərici əvvəlki həftə ilə müqayisədə 10 faiz artıb. Bütün yeni halların və ölüm hallarının 80 faizi Avropa və Amerika qitələrinin payına düşür.
Elə həmin dövrdə ÜST-nin Avropa regionunda 1,2 milyon yoluxma halı qeydə alınıb, 21 min nəfər dünyasını dəyişib. Ən çox ölüm halı Rusiyanın payına düşdü - 2,9 min nəfər (yüz min əhaliyə iki ölüm hadisəsi). Amma yaxşı xəbərlər də var: ötən həftə Tacikistanda COVID-19-dan heç bir yeni yoluxma və ölüm hadisəsi qeydə alınmayıb.
Ümumdünya Səhiyyə Təşkilatının ekspertləri həftəlik hesabatda, həmçinin, yeni koronavirus da daxil olmaqla, bütün virusların zamanla mutasiya olunduqlarını xatırladıblar. Yeni ştammların bəziləri ictimai səhiyyə üçün böyük təhlükə yarada bilər. Bunlardan biri hələ ötən ilin iyun ayında Kaliforniyada aşkar edilən CAL20C / L452R versiyası ola bilər. O vaxtdan bəri o, bütün Amerika ştatlarında və dünyanın daha 26 ölkəsində aşkar edilib.
Ekspertlərin rəyinə görə, bu ştamm daha asan ötürülə bilər. Bundan başqa, müəyyən edilib ki, koronavirusun bu variantı halında xəstəliyi keçirmiş insanların qanında anticisimlərin təmin etdiyi müdafiə səviyyəsi bir qədər düşür. Monoklonal anticisimlərin istifadəsi ilə müalicə də daha az təsirli ola bilər. Lakin bütün bunlar ilkin məlumatlardır - ÜST və ABŞ Xəstəliklərə Nəzarət və Profilaktika Mərkəzinin (CDC) nümayəndələri daha ətraflı məlumat üzərində işləyirlər.
Bölmənin digər xəbərləri
