Bakı, 11 sentyabr, AZƏRTAC

“Həyatımın ən gözəl günlərini orada yaşamışam. Şükür ki, yenidən o torpaqlara qayıdıram”.

AZƏRTAC xəbər verir ki, bu fikirləri Laçından olan keçmiş məcburi köçkün, bu gün doğma yurduna yola salınan Hüsniyyə Hüseynova deyib.

“Sevincimin həddi-hüdudu yoxdur. Bu hissi dilə gətirmək mümkün deyil. Allah bu sevincli günü bütün məcburi köçkünlərə nəsib etsin. Hamı öz yurd-yuvasına, el-obasına qayıtsın”, - deyə o bildirib.

H.Hüseynova, həmçinin ona bu günləri yaşadan Azərbaycan Prezidentinə və Ordusuna minnətdarlığını bildirib: “Laçın şəhərini tərk edəndə 28 yaşım vardı, ora 61 yaşımda qayıdıram. Doğma yurduma həyat yoldaşım və qızımla dönürəm. Allah Azərbaycan Ordusunu, Prezidentini qorusun”.

Qeyd edək ki, Prezident İlham Əliyevin tapşırığına uyğun olaraq, sentyabrın 11-də Laçın şəhərinə növbəti köç karvanı yola salınıb. İndiyədək Laçın şəhərinə 570 ailənin, yəni 2 min 090 nəfərin daimi məskunlaşması təmin edilib.