Bakı, 19 aprel, AZƏRTAC

Mayalanmış süd olan kefir Qafqaz xalqlarının 300 ildən çoxdur ki, istifadə etdikləri şəfalı içkidir. İnək, qoyun və keçi südündən hazırlanır.

Həkim-fitoterapevt Füzuli Hüseynov AZƏRTAC-a kefirin insan orqanizmi üçün faydalarından danışarkən bildirib ki, kefir təbii probiotikdir, həm də mineral və vitamin mənbəyidir.

Onun sözlərinə görə, kefir antibiotik qəbulu zamanı baş verən bağırsaq disbakteriozunu aradan qaldırır, ödemləri azaldır, qəbizliyi aradan götürür, immuniteti artırır, qanda xolesterini aşağı salır, A vitamini ilə zəngin olduğundan gözə xeyri var. Tərkibində kalsium olduğundan osteoporoz xəstəliyində şəfalıdır. Qaraciyəri bərpa edir, ekzemalarda, sızanaqlarda, dəri göbələyində də faydalıdır. Xərçəngin profilaktikası zamanı istifadə olunur. Kefirdən mütəmadi istifadə etdikdə saçlar qalınlaşır və gurlaşır. Bütün bu və başqa xəstəliklərə tutulmamaq, həmçinin müalicə olunmaq üçün gündə 2 stəkan kefir içmək lazımdır.

Bəs kefir necə hazırlanır? Həkim-fitoterapevt bildirib ki, əvvəlcə kefir mayası əldə edilir, daha sonra maya 2 stəkan otaq temperaturunda olan bişmiş inək südünə (mağaza südü olmaz) qarışdırılır. Yayda 10-12, qışda isə 20-24 saat keçəndən sonra süd qatıq kimi olacaq. Sonra kefir plasmas süzgəcdən süzülür, mayası çıxarılır və yenə növbəti gün üçün hazırlanan 2 stəkan südün içinə atılır. Əgər kefir mayasını istifadə etmək istəməsəniz, onda mayanı yarım stəkan çiy suya salıb soyuducuya qoyun, nə zaman istəsəniz sudan çıxarıb istifadə edə bilərsiniz.

“Sağlam bağırsaqda 1-1,5 kiloqram mikroorqanizm yaşayır. 500 növdən ibarət və 100 trilyona qədər bakteriya bağırsaq florasını və immun sistemini təşkil edir. Bağırsaq mikroflorasını qorumaq üçün probiotiklərə ehtiyac var, kefir isə təbii probiotik mənbəyidir. Xatırladım ki, kefir qatıq deyil. Qatıq probiotik istehsalını artırır, kefir isə özü probiotikdir. Qatıq mütəmadi istifadə olunduqda mədə turşuluğunu artırır, kefir isə əksinə normallaşdırır”, - deyə Füzuli Hüseynov əlavə edib.