Kiber-ekstremizmә qarşı fәaliyyәt: sosial media, kommunikasiya sistemlәri, videooyunlar VİDEO
Bakı, 26 aprel, AZӘRTAC
Aprelin 26-da BMT-nin Sivilizasiyalar Alyansının VII Qlobal Forumu çәrçivәsindә “Tәtbiqi proqramlar vә videooyunlar vasitәsilә kiber-ekstremizm әleyhinә әks-tәbliğat tәdbirlәri" mövzusunda bölmә iclası keçirilib.
AZӘRTAC xәbәr verir ki, iclasın moderatoru “Peace Geeks”in prezidenti xanım Rene Blәk bildirib ki, texnologiyaların müasir inkişafı bu mövzunun aktuallığını labüd edir vә ekstremizmlә mübarizәdә internetdәn istifadә olunması mәsәlәlәri diqqәt mәrkәzindәdir.
Hindistan Texnologiya Universitetinin tәdqiqatçısı Aditeşvar Set kommunikasiya sistemlәrinin daha geniş әrazilәrdә yayılmasının vacib olduğunu qeyd edib. Onun sözlәrinә görә, Hindistanda internet şәbәkәsinin bütün ölkәni әhatә etmәsi üçün tәdbirlәr hәyata keçirilir. O, çıxışında әmәkdaşı olduğu universitet tәrәfindәn hazırlanan kommunikasiya sistemini tәqdim edib. Aditeşvar Set bu sistemin insanların dövlәt qurumları vә digәr strukturlarla әlaqә qurmasını asanlaşdırdığını söylәyib.
“Peace TechLab” tәşkilatının direktoru Timoti Resiver texnologiyalar vә media alәtlәrdәn istifadә etmәklә sülh vә sabitliyin tәmin edilmәsindәn danışıb. O, qeyd edib ki, tәşkilat bu mәqsәdlә mühәndislәri, texnoloqları vә alimlәri öz әtrafında birlәşdirәrәk layihәlәr hazırlayır vә müxtәlif dövlәtlәrlә әmәkdaşlıq edir. Timoti Resiver son dövrlәrdə әsas diqqәtin onlayn ekstremizmin qarşısının alınmasına yönәldiyini deyib.
Sosial şәbәkәlәr vasitәsilә ekstremist qrupların müәyyәn edilmәsi Strateji Dialoq İnstitutunun diqqәtindәdir. İnstitutun Zorakı Ekstremizm Әleyhinә Proqramın koordinatoru Tanya Silverman fәaliyyәtlәrini әsasәn sosial şәbәkәlәrlә birgә qurduqlarını bildirib. O deyib ki, mәqsәd Facebook-da ekstremizmә meyilli insanları tapmaqdır. “Biz ekstremist kontenti, mәsәlәn, İŞİD kimi terrorçu qrupların simvollarından istifadә edәnlәri tapıb onlarla dialoq qururuq. Radikallaşma riski altında olan belә insanlara mesaj göndәrilir vә dialoq başlayır. Onların әksәriyyәti әsasәn gәnclәrdir. Çox yaxşı haldır ki, onların böyük hissәsi dialoqa gedir vә bizә müsbәt yanaşırlar”, - deyə T.Silverman vurğulayıb.
“Sülh Naminә Oyunlar" qrupunun tәsisçisi Hans Şakur virtual oyunlar vasitәsilә gәnclәrdә sülhә vә quruculuğa hәvәs yaratmağa çalışdıqlarını bildirib. O qeyd edib ki, eksperiment qruplarına әsasәn müharibә zonasından olan yeniyetmәlәr cәlb edilir. “Hәtta iki rәqib ölkәnin yeniyetmәlәri onlayn rejimdә eyni oyunu oynayaraq virtual quruculuq işlәri hәyata keçirir, birgә yaşayışın mümkünlüyünü, sülhün zәruri olduğunu anlamağa başlayırlar”, - deyә o, bildirib.
Simon Feyser Universitetinin professoru Adel İskandar terrorizm vә ekstremizmlә mübarizәdә adi insanların hansı üsullardan istifadә etdiklәrinә diqqәt çәkib. O qeyd edib ki, ekstremizmә qarşı çıxan gәnclәr sosial şәbәkəlәrdә özlәri hazırladıqları karikatura vә mətnli şәkillәr hazırlayıb yayırlar. İŞİD vә digәr ekstremist qruplara qarşı bir çox fotoşәkillәr hazırlanıb ki, bunlar da hәmin zülmkarların hәqiqi üzünü göstәrmәyә imkan verir, insanların baxışını dәyişә bilir.
İclasda mövzu ətrafında geniş müzakirələr aparılıb, təkliflər səsləndirilib.
Bölmənin digər xəbərləri
