Kilian Mbappe Lionel Messinin rekordunu yeniləyib
Bakı, 10 dekabr, AZƏRTAC
UEFA Çempionlar Liqasının qrup mərhələsinin 6-cı turunda “Başakşəhər”lə keçirilən oyun “Paris Sen-Jermen”in hücumçusu Kilian Mbappe üçün əlamətdar olub.
AZƏRTAC xəbər verir ki, 21 yaşlı fransalı futbolçu 5:1 hesabı ilə qalib gəldikləri oyunda dubl etməklə qitənin ən nüfuzlu turnirində yeni rekord müəyyənləşdirib.
K.Mbappe turnirdə 20 qol vuran ən gənc futbolçu kimi tarixə düşüb. Hazırda 21 yaşı olan Mbappedən əvvəl bu rekord “Barselona”nın hücumçusu Lionel Messiyə məxsus idi. Argentinalı futbolçu UEFA Çempionlar Liqasında 20-ci qolunu vuranda (2010-cu ilin fevralında) 22 yaş 267 günlük idisə, Mbappe bu saya 21 yaş 355 günlüyündə çatıb.
Qeyd edək ki, fransalı hücumçu cari mövsümdə Paris təmsilçisinin heyətində keçirdiyi 14 oyunda 12 qolun müəllifi olub.
Bölmənin digər xəbərləri
