Konqo DR-də Ebola xəstələrinin müalicəsi düşərgəsi etirazçılar tərəfindən yandırılıb
Bakı, 22 may, AZƏRTAC
Yerli bir məmurun sözlərinə görə, cümə axşamı günü Konqo Demokratik Respublikasının (KDR) şərqindəki İturi əyalətində xəstəlikdən ölən qohumlarının cəsədlərini tapmaq üçün Ebola müalicə mərkəzinə hücum edən qəzəbli etirazçılar çadırları yandırıblar.
AZƏRTAC xarici mediaya istinadla xəbər verir ki, yerli məmur Luk Malembenin sözlərinə görə, zorakılıq İturinin əyalət paytaxtı Bunianın kənarındakı Rvampara müalicə mərkəzində baş verib. Ebola qurbanlarının ailələri mərhumların bu virusdan öldükləri barədə yayılan xəbərləri təkzib edərək cəsədlərinin dəfn edilməsini tələb ediblər.
Rvampara şəhərində jurnalistlərə açıqlama verən hökumət rəsmisi bildirib ki, izdiham xəstəxananın qarşısında toplaşıb və qohumlarının cəsədlərini verməkdən imtina edildikdə, Ebola xəstələrini müalicə edən bir neçə çadırı yandırıb. Polis etirazçıları gözyaşardıcı qaz və xəbərdarlıq atəşi ilə ərazidən uzaqlaşdırıb.
Zorakılıq halları 2020-ci ildə Konqonun şərqində tibb işçilərinə inamsızlıq səbəbindən bir neçə səhiyyə mərkəzinə silahlı qruplar və qəzəbli mülki şəxslər tərəfindən hücum edildiyi hadisələri xatırladır.
Xəstəliyin yayılması rəsmi olaraq mayın 15-də Konqonun şərqindəki İturi əyalətində elan edilib. O vaxtdan bəri bu ölkənin səhiyyə orqanları və Ümumdünya Səhiyyə Təşkilatı (ÜST) təxminən 600 şübhəli yoluxma və 139 ölüm hadisəsi barədə məlumat verib. Epidemiya Şimali Kivu və indi Cənubi Kivuya yayılıb. Qonşu Uqandada da Konqo vətəndaşları ilə bağlı yoluxma qeydə alınıb.
Afrika Xəstəliklərə Nəzarət və Profilaktika Mərkəzinin (Africa CDC) baş direktoru Cin Kaseya cümə axşamı günü insanları profilaktik tədbirlərə ciddi şəkildə riayət etməyə çağırıb. Bunia şəhərində çıxış edən baş direktor Afrikadakı tərəfdaşların Ebolaya qarşı mübarizə səylərinə sadiqliyini bir daha təsdiqləyib. “Bizim yüksək motivasiyalı, təcrübəli komandalarımız var və bu epidemiyanı idarə etmək üçün onları gücləndirəcəyik”, - deyə o bildirib.
Ötən bazar günü ÜST Konqonun şərqində şübhəli infeksiya və ölüm hallarının sayının artmasından sonra Bundibugyo ştammının yaratdığı Ebola epidemiyasını qlobal səhiyyə fövqəladə vəziyyəti elan edib.
Bölmənin digər xəbərləri
