Koronavirusla əlaqədar Qərbi Qazaxıstan vilayətində yeni məhdudiyyətlər tətbiq olunacaq
Nur-Sultan, 23 iyun, AZƏRTAC
Koronavirus pandemiyasının yayılmasının qarşısının alınması ilə əlaqədar iyunun 27-29-da Qərbi Qazaxıstan vilayətində yeni məhdudlaşdırıcı tədbirlər tətbiq olunacaq.
AZƏRTAC xəbər verir ki, vilayətin baş sanitar həkiminin yeni qərarı ilə istirahət günlərində bütün ictimai iaşə obyektlərinin işinin məhdudlaşdırılması, nəqliyyatın fəaliyyətinin dayandırılması qərara alınıb. Vətəndaşlara yalnız müvafiq arayışları olduğu halda yaşayış yerini tərk etməyə icazə veriləcək. Əlavə vaxt məhdudiyyətləri dövründə 65 yaşdan yuxarı insanlara həddən artıq ehtiyac olmadan küçəyə çıxmaq qadağan edilir.
Son məlumatlara görə, iyunun 22-nə qədər vilayətdə koronavirus infeksiyasına yoluxanların sayı 1186 nəfərə çatıb. Onlardan 822-si tam sağalıb, 6 nəfər ölüb.
Xatırladaq ki, Qazaxıstanda koronavirusun yayılması ilə əlaqədar martın 16-dan mayın 11-dək fövqəladə vəziyyət rejimi tətbiq olunub. Ölkənin müxtəlif bölgələrində karantin tədbirləri hələ də davam etdirilir.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
