Koto ifaçısı Nobutaka Yoşizava: Bakıda tarixlə müasirliyin vəhdəti insanı valeh edir
Bakı, 15 mart, Emil Məlikov, AZƏRTAC
Koto təxminən 1300 il əvvəl Yaponiyada ifa olunmağa başlayan qədim musiqi alətidir. Əvvəllər daha çox saray musiqi aləti kimi istifadə olunsa da, hazırda konsert salonlarında da bu alət ifa olunur. Koto əsasən 13 simli musiqi alətidir və simlərin artırılması da nəzərdə tutulur. Mənim bugünkü konsertdə ifa edəcəyim musiqilərin bir çoxu 300 il tarixə malikdir. Bundan əlavə, daha müasir koto musiqiləri də səslənəcək. Həmçinin Azərbaycanın ənənəvi muğam ifaçıları ilə birgə bu alətdə sintez ifalar təqdim olunacaq.
Bu sözləri AZƏRTAC-a açıqlamasında Yapon ənənəvi musiqi aləti olan koto ifaçısı Nobutaka Yoşizava deyib.
“Mən Azərbaycana ilk dəfədir gəlmişəm və dünən qısa zamanda İçərişəhərdə gəzmək şansı əldə etdim. İçərişəhərdə gəzən zaman tarixi məqamlardan başqa onun ətrafında müasir hündür binaları da gördüm. Alov qüllələri qədim tikililərin fonunda daha gözəl mənzərə yaradır. Xüsusən axşamlar Bakı şəhəri tam fərqli və gözəl təsir bağışlayır. Bu şəhərdə tarixlə müasirliyin vəhdəti insanı valeh edir. İnsanlara gəlincə isə Bakı əhalisi çox səmimi və qonaqpərvərdir”, - deyə koto ifaçısı qeyd edib.
Bölmənin digər xəbərləri
