Kremlin sözçüsü: Lukaşenko Putinə Zelenskinin mesajını çatdırmayıb
Moskva, 29 iyun, AZƏRTAC
Rusiya Prezidentinin mətbuat katibi Dmitri Peskov jurnalistlərə bildirib ki, Belarus Prezidenti Aleksandr Lukaşenko Volodimir Zelenskinin Rusiya Prezidenti Vladimir Putinə heç bir mesajını çatdırmayıb.
AZƏRTAC xəbər verir ki, onun sözlərinə görə, Valdayda qeyri-rəsmi danışıqlar zamanı Vladimir Putin və Aleksandr Lukaşenko Ukraynadakı vəziyyəti, regional təhlükəsizlik məsələlərini və Minskdə təxribat cəhdlərini müzakirə ediblər.
Peskov, həmçinin qeyd edib ki, danışıqların əsas diqqət mərkəzində Rusiya ilə Belarus arasında ikitərəfli münasibətlər, eləcə də iqtisadi-ticari əməkdaşlığın inkişafı olub.
İki lider arasında danışıqlar 26-27 iyun tarixlərində Valdayda baş tutub. Danışıqlardan sonra Lukaşenko Asiyaya səfər edib və orada Çinin Sədri Si Cinpin ilə görüşüb.
Jurnalistlərin Belarus Prezidentinin Moskva ilə Kiyev arasında rabitə kanalı olub-olmaması ilə bağlı suallarını cavablandıran Peskov şərh verməkdən imtina edib. O, effektiv fəaliyyəti təmin etmək üçün mövcud rabitə kanallarının gizli qalmalı olduğunu vurğulayıb.
Bölmənin digər xəbərləri
