Kür və Araz çaylarında çirkləndiricilər normadan artıqdır

03.10.2011 [16:48]
Çap et
A⁺ A^-

Bakı, 3 oktyabr (AZƏRTAC). Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların qollarının çirklənmə səviyyəsini öyrənmək məqsədi ilə sentyabrın üçüncü ongünlüyü üçün keçirdiyi monitorinqin nəticələrini açıqlamışdır.

Nazirliyin mətbuat xidmətindən AZƏRTAC-a verilən məlumata görə, Kür çayında su sərfi sentyabr ayının ikinci ongünlüyünə nisbətən saniyədə 35,2 kubmetr artaraq saniyədə 129 kubmetr təşkil etmişdir.

Qeyd edək ki, Gürcüstan və Ermənistan ərazilərindən məişət tullantıları və sənaye müəssisələrinin çirkab suları təmizlənmədən birbaşa Kürə axıdılır. Nəticədə çayın aşağı axınındakı məntəqələrdə biogen maddələrin miqdarı normanı dəfələrlə keçmişdir.

Eyni hal Araz çayının Horadiz, Birinci Şahsevən və Bəhramtəpə məntəqələrində də müşahidə olunmuşdur.

Suyun oksigen rejimi isə bütün məntəqələrdə sanitar norma daxilində dəyişmişdir.