Laçında ölkəmizin xarici və beynəlxalq təxribatlar qarşısında dönməz mövqeyi ifadə edildi
Bakı, 30 avqust, AZƏRTAC
İkinci Qarabağ müharibəsində məğlub edilib, kapitulyasiya aktı imzalamağa məcbur edilən Ermənistan dövləti 2020-ci il dekabrın 1-də Laçın rayonunu tərk etdi. Buna baxmayaraq, Ermənistanı Xankəndi ilə birləşdirən Laçın yolu şəhərin mərkəzindən keçdiyi üçün Laçın şəhəri və iki kənd - Zabux və Sus kəndləri Rusiya sülhməramlılarının nəzarət zonasında qalmışdı. Prezident, şanlı Ordumuzun Müzəffər Ali Baş komandanı İlham Əliyevin israrlı mövqeyi nəticəsində Laçın yoluna alternativ avtomobil yolu 1 il 8 ay ərzində inşa edilib başa çatdırıldı. Bundan sonra, 2022-ci il avqustun 26-da Azərbaycan Ordusu Laçın şəhərinə daxil oldu.
Prezidentin Sərəncamı ilə Azərbaycan Respublikasının işğaldan azad edilmiş əraziləri üzrə şəhər günləri təsis edildi. Beləliklə, avqustun 26-sı Laçın Şəhəri Günü kimi təsdiqləndi.
Bu barədə AZƏRTAC-a açıqlamasında Sosial Tədqiqatlar Mərkəzinin (STM) baş məsləhətçisi Şəhla Cəlilzadə deyib.
Avqustun 26-da Prezident İlham Əliyevin və birinci xanım Mehriban Əliyevanın Laçın rayonuna səfər etdiklərini xatırladan Ş.Cəlilzadə bildirib: “Onlar Laçın Şəhəri Günü münasibətilə təşkil olunmuş bayram şənliyində iştirak edib, Laçına Böyük Qayıdışın ilkin nümayəndələri ilə görüşüb, həmçinin burada ötən bir il ərzində görülən çoxsaylı quruculuq işləri ilə tanış olublar. O cümlədən Laçın şəhərinə yaxın ərazidə inşa ediləcək mehmanxana kompleksinin təməlqoyma mərasimində, Laçın rayonunun sənaye zonasında mebel fabrikinin, “Hoçazfilm” yaradıcılıq studiyasının çəkiliş pavilyonunun, Laçın rayon 2 saylı tam orta məktəbin, “Həkəri Balıq Təsərrüfatı”nın, “Mişni” və “Alxaslı” kiçik SES-lərin açılışı mərasimlərində iştirak ediblər.
Xüsusilə “Laçın Şəhəri Günü” münasibətilə təşkil olunmuş tədbirdə ölkəmizin müxtəlif yerlərindən gələn qonaqlarla yanaşı, xarici ölkələri təmsil edən diplomatların da iştirak etməsi dövlətimizin uğurlarının beynəlxalq aləmdə tanınması, bilinməsi və təqdir edilməsi baxımından əlamətdardır. Tədbirə qatılan Ukraynanın ölkəmizdəki səfirinin “Arzu edirəm ki, biz də öz torpaqlarımızı azad etdikdən sonra Laçındakı kimi sürətli quruculuq işlərini həyata keçirə bilək” deməsi Azərbaycanın dünya üçün müsbət bir nümunə yaratdığını göstərir. Uğurlu Vətən savaşı aparıb qalib gəlmək və torpaq həsrətinə son qoymaq hər xalqa nəsib olmur. Azərbaycan 44 günlük Vətən müharibəsinin hər bir günü ilə, 30 ildən sonra torpaqlarını işğaldan azad edib bölgədə apardığı yenidənqurma işləri, xüsusilə Böyük Qayıdışı uğurla həyata keçirməklə dünyaya dərslər verir”.
STM-in baş məsləhətçisi əlavə edib ki, Prezident İlham Əliyevin hər dəfə Laçında olarkən dünyaya və ermənilərə xəbərdarlığı və ötürdüyü mesajlar da diqqətçəkəndir. Laçında səsləndirilən mesajlarda Prezident İlham Əliyev xarici və beynəlxalq təxribatlar qarşısında dönməz mövqeyini ifadə etdi. Odur ki, hazırda bir sıra ölkələr, xüsusilə Fransanın təsiri ilə Laçın yoluna dair nə qədər anti-Azərbaycan mövqeli fikirlər səsləndirsələr və bəyanatlar qəbul etsələr də, Azərbaycan tamamilə beynəlxalq hüquqa uyğun olaraq öz sərhədinin təhlükəsizliyini təmin edir və bu mövqeyindən dönməyəcək. Təsadüfi deyil ki, Fransa bir sıra dövlətlərin ölkəmizdəki nümayəndələrini Laçın Şəhəri Günü münasibətilə keçirilən tədbirə qatılmamağa səsləsə də, bu mənfur çağırışlar cavabsız qaldı. Bundan sonra da Zəfər ildönümlərimiz daim ən yüksək ovqatda qeyd ediləcək.
Bölmənin digər xəbərləri
