Landini traktor hekayəsi - Rektorumuzun ad günündə gənclərimizə hədiyyəsi VİDEO
Bakı, 2 may, AZƏRTAC
ADA Universitetinin Akademik işlər üzrə prorektoru Vəfa Kazdal Rektor Hafiz Paşayevin doğum günündə onun Universitetlə bağlı təşəbbüslərini ADA icması ilə hekayə kimi bölüşüb. AZƏRTAC həmin hekayəni və onu əks etdirən videonu təqdim edir.
Hər yeni başlanğıcın bizə “məhz bu o andır” hissini yaşadan bir məqamı olur. Bu bir inam və nikbinlik qığılcımını alovlandıran, həqiqətən də, xəyalların real ola biləcəyini təsdiqləyən həmin andır. Çox vaxt liderlər tərəfindən yaradılan bu təşviqedici anlar hər kəsi bir vəzifə və yaxud məqsəd ətrafında birləşməyə sövq edir.
Məhz bu anlardan biri bir neçə gün əvvəl İtaliyanın Bolonya Universitetinin nümayəndə heyətinin rektoru Covanni Molarinin rəhbərliyi altında ADA və Bolonya universitetlərinin “Kənd təsərrüfatı və qida elmlərinin idarə edilməsi” adlı birgə sertifikat proqramına başlamaq üçün gəldikləri ölkəmizə ziyarət əsnasında yaşandı. Bu proqram ADA Universitetinin yeni yaranan Kənd təsərrüfatı və qida sənayesi fakültəsinin ilk proqramıdır.
ADA Universiteti İnformasiya texnologiyaları, iqtisadiyyat, mühəndislik, idarəetmə və beynəlxalq münasibətlər üzrə kadr hazırlığında xeyli təcrübəyə malik olsa da, hazırkı dövrdə Azərbaycanda kənd təsərrüfatının inkişafı üçün peşəkarlar yetişdirmək bizim üçün yeni çağırışdır. Sirr deyil ki, bu sahə gənclərimiz üçün o qədər də cəlbedici deyil. Bir çox gənclərdə hələ də bu sahəyə inamsızlıq var, çünki bu sahə məhdud potensiallı, az innovasiyalı və aşağı gəlirlidir. Bu səbəbdən, nəhayət ki, başladığımız bu proqramda qarşımızda duran ən mühüm və maraqlı vəzifələrdən biri gənclərimizdə bu sahəyə qarşı istək oyatmaq, onlarda stimul yaratmaq idi.
Bolonya Universitetindən olan tərəfdaşlarımızın səfəri qeyri-iş günlərinə təsadüf etdiyindən qonaqlarımızı münbit torpaqları və müasir infrastrukturu görmələri, həmçinin bölgə ilə tanış olmaları və xoş zaman keçirmələri üçün Şamaxıya apardıq. Ətrafdakı bayram havası masa ətrafında apardığımız mədəniyyət, bilik və təcrübə mübadiləsinə ayrıca bir rəng qatırdı.
Rektor Molarinin səfərindən əvvəl biz onun tədqiqat fəaliyyətinin kənd təsərrüfatı maşınları ilə bağlı olduğunu və traktorlara olan xüsusi marağı haqqında eşitmişdik. Elə buna görə də düşündük ki, rektorun italyan Landini traktorunu idarə etməsi yeni təşəbbüsümüz üçün simvolik bir an olacaqdır. Şamaxı isə bu təşəbbüsü reallaşdırmaq üçün ən gözəl məkan idi. Traktorlar əvvəlcədən hazılanmışdı və sanki bizi qarşılamaq üçün sıraya düzülmüşdü. Mənim traktorlarla bağlı xatirələrim sovet dövrünə gedib çıxır: onlar çox böyük idi və açığı o qədər də cəlbedici deyildi. Lakin Landini traktorları yığcam, müasir idi və gözəl mavi rəngə boyanmışdı, çox “tərz” görünürdü. Dərhal tələbələrimiz gözümün önündə canlandı - parlaq, dinamik, yenilikçi gənclər belə bir avtomobilin sükanı arxasında qollarını çırmalayır, aqronom olmaq və bu sahəyə yeni nəfəs vermək üçün cəsarətli və əmin addımlarla irəliləyirlər.
Rektor Molari traktorlardan birini idarə edərkən rektor Paşayev də başqa bir traktorun sükanının arxasına keçdi və sürməyə başladı. Bu, gənclərimizə bir çağırış idi. Regionun ən yaxşı kənd təsərrüfatı fakültələrindən birini qurmaq və kənd təsərrüfatı iqtisadiyyatına yeni nəfəs gətirməyə səsləyən bir çağırış.
Hər iki rektorun Landinini idarə etməyi “məhz bu o an idi ” - bir missiya ətrafında birləşdirən, güvən, nikbinlik və özündə inam doğuran, liderlər tərəfindən yaradılan və ruh yüksəkliyi oyadan o an.
ADA və Bolonya universitetlərinin əməkdaşlığı ilə hazırlanan üç moduldan ibarət birgə sertifikat proqramının ilk sessiyası aprelin 25-də başladı və aprelin 29-da uğurla başa çatdı. Bu birgə sertifikat proqramına nazirliklərdən, şirkətlərdən və elmi-tədqiqat institutlarının idarə heyətindən 30 aparıcı mütəxəssis və tədqiqatçı cəlb olunub. İkinci modul onlayn formatda təşkil olunacaq. Sonuncu modulda isə azərbaycanlı mütəxəssislərimiz seminar və sahə səfərlərində iştirak etmək üçün bu ilin iyul ayında Bolonyaya gedəcəklər.
Bu sertifikat proqramı ilə yanaşı digər tərəfdaşımız olan Luiss Universiteti ilə yeni başladığımız qlobal idarəetmə və siyasət ikili diplom magistr proqramı çoxşaxəli İtaliya-Azərbaycan Universiteti layihəsinin ilk bəhrələridir.
Azərbaycan Respublikasının Prezidenti İlham Əliyevin təşəbbüsü ilə baş tutan İtaliya-Azərbaycan Universiteti layihəsi ölkəmizdə ali təhsil sisteminin təkmilləşdirilməsi və İtaliyanın tanınmış universitetləri ilə əlaqələrin genişləndirilməsi məqsədi daşıyır. Kənd təsərrüfatı, mühəndislik, memarlıq və dizayn sahələrində qlobal təcrübəyə malik beş nüfuzlu İtaliya universiteti ADA Universiteti ilə birlikdə Kənd təsərrüfatı və Qida elmləri və Dizayn və memarlıq fakültələri quracaqlar. Bu iki yeni fakültə ilə yanaşı mövcud İnformasiya texnologiyaları, Mühəndislik və Biznes fakültələrində də bir sıra ikili diplom proqramları tətbiq ediləcək.
Bu yaxınlarda rektor Paşayevin televiziya müsahibəsində vurğuladığı kimi, ADA Universitetinin əsas məqsədi Azərbaycanın postneft iqtisadiyyatının inkişafına töhfə verəcək sahələrdə yeni mütəxəssislər hazırlamaq və onlar üçün karyera imkanlarını genişləndirməkdir.
Bu gün - mayın 2-si rektor Paşayevin ad günüdür! Adətən ad günləri dostlarımızın və ailəmizin hədiyyələr verdiyi günlərdir. Ancaq bu dəfə Rektorumuz öz ad günündə gənclərimizə özü hədiyyə etdi - yeni iş imkanları və ölkələrinin gələcək inkişafının bir parçası olmaq fürsətləri!
Ad gününüz mübarək, cənab Rektor! Dəyərli hədiyyəniz üçün təşəkkür edirik!
Bölmənin digər xəbərləri
