Lənkəranda meşələrin mühafizəsinə həsr olunmuş seminar keçirilmişdir
Lənkəran, 13 iyul (AZƏRTAC). İyulun 12-də Lənkəran şəhərindəki “Qala” hotelində meşələrin mühafizəsinə həsr olunmuş seminar keçirilmişdir.
AZƏRTAC xəbər verir ki, Avropa İttifaqının maliyyə dəstəyi ilə keçirilmiş təlim məşğələsində meşələrin mühafizəsi və bərpası idarəsinin əməkdaşları, ekoloqlar və cənub bölgəsində fəaliyyət göstərən KİV-lərin təmsilçiləri iştirak etmişlər.
Seminarda çıxış edən Sosial İqtisadi Araşdırmalar İctimai Birliyinin sədri Azad Əliyev, “Meşə sektorunda qanunun tətbiqi və idarəetmənin təkmilləşdirilməsi Proqramı”nın məsləhətçisi Azər Qarayev və başqaları qeyd etmişlər ki, son 200 ildə dünya səviyyəsində meşə sahələri 2 dəfə azalaraq 4 milyard hektarı əhatə etmişdir. Bu sahələrin də böyük hissəsi Rusiya, Braziliya, Kanada və ABŞ-ın ərazisinə daxildir. Meşə zolaqlarının azalması Azərbaycanda da müşahidə olunur.
Bildirilmişdir ki, meşə sektorunda idarəetmə sisteminin təkmilləşdirilməsinin uğurla həyata keçməsi üçün sektorlar arasında əməkdaşlığa və maraqlı tərəflərin fəal iştirakına ehtiyac vardır.
Azərbaycan meşə örtüyü sıx olmayan ölkələr sırasına aiddir. XVIII əsrdə meşə sahələri Azərbaycan ərazisinin 35 faizini təşkil etdiyi halda, bu gün respublikanın cəmi 11 faiz ərazisi meşə örtülü sahələrdən ibarətdir. Ölkəmizdə adambaşına 0,2 faiz meşə sahəsi düşür. Meşələr respublikamızın ərazisində qeyri-bərabər paylanmışdır. Bunun 94 faizi dağlıq, 6 faizi düzənliklərdən ibarətdir.
Seminarın sonunda iştirakçıları maraqlandıran suallar cavablandırılmışdır.
Bölmənin digər xəbərləri
