Lənkəranda “Xocalı-tariximizin qan yaddaşıdır” mövzusunda inşa və rəsm müsabiqəsi keçirilmişdir
Lənkəran, 22 fevral (AZƏRTAC). Lənkəran rayonunun Sütəmurdov kənd tam orta məktəbində “Xocalı-tariximizin qan yaddaşıdır” mövzusunda inşa və rəsm müsabiqəsi keçirilmişdir.
AZƏRTAC xəbər verir ki, Lənkəran Şəhər İcra Hakimiyyətinin yetkinlik yaşına çatmayanların işləri və hüquqlarının müdafiəsi üzrə komissiyasının və rayon təhsil şöbəsinin birgə təşkilatçılığı ilə Xocalı soyqırımının 21-ci ildönümünə həsr olunmuş müsabiqədə məktəbin 9-11-ci sinif şagirdləri iştirak etmişlər.
Fevralın 22-də müsabiqəsinin qalibləri müəyyən olunmuşdur.
Tədbir iştirakçıları əvvəlcə Xocalı soyqırımının dəhşətlərini əks etdirən rəsm sərgisi ilə tanış olmuşlar.
Sərgidə məktəbin 50 şagirdinin əl işi nümayiş etdirilmişdir. Rəsmlərdə ermənilərin uşaqlara, qadınlara və silahsız insanlara divan tutması müxtəlif epizodlarda təsvir edilmişdir.
Hər iki müsabiqənin qalibləri müəyyən edildikdən sonra Xocalı soyqırımının dünya ictimaiyyətinə çatdırılması məqsədilə məktəbin 180 şagirdi internet aksiyasına qoşulmuşdur.
Hazırlanmış mətnlər Azərbaycandakı xarici ölkə səfirliklərinə və beynəlxalq təşkilatların nümayəndəliklərinə, eləcə də sosial şəbəkələrə göndərilmişdir.
Xocalı soyqırımını əks etdirən müxtəlif mətnlər sosial şəbəkələrdə 3 min iştirakçı arasında paylanılmışdır.
İnşa və rəsm müsabiqəsinin qaliblərinə fəxri fərmanlar təqdim edilmişdir.
Tədbirin sonunda Xocalı faciəsini əks etdirən 20 dəqiqəlik video-çarx və şagirdlərin ifasında ədəbi-bədii kompozisiya nümayiş etdirilmişdir.
Bölmənin digər xəbərləri
