REGİONLAR
Lerikdə Xocalı soyqırımının 30-cu ildönümü ilə əlaqədar anım tədbiri keçirilib
![](/files/galleryphoto/2022/1/1200x630/1645863319685465458_1200x630.jpg)
![](/files/galleryphoto/2022/1/1200x630/16458633191898431664_1200x630.jpg)
![](/files/galleryphoto/2022/1/1200x630/16458633193284323964_1200x630.jpg)
![](/files/galleryphoto/2022/1/1200x630/1645863319480074343_1200x630.jpg)
![](/files/galleryphoto/2022/1/1200x630/16458633195102544639_1200x630.jpg)
![](/files/galleryphoto/2022/1/1200x630/16458633195616046376_1200x630.jpg)
Lerik, 26 fevral, Bağır Əliyev, AZƏRTAC
Lerikdə Xocalı soyqırımının 30-cu ildönümü ilə əlaqədar anım tədbiri keçirilib.
Tədbirdə Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev, Lənkəran Regional Mədəniyyət İdarəsinin rəisi Şahin Şahbazov, rayonun hüquq-mühafizə orqanlarının, idarə, müəssisə və təşkilat rəhbərləri, ictimaiyyət nümayəndələri iştirak ediblər.
AZƏRTAC-ın bölgə müxbiri xəbər verir ki, tədbir iştirakçıları əvvəlcə “Şəhidlər” abidə kompleksinin önünə gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların, Xocalı soyqırımı qurbanlarının xatirəsini dərin hüznlə anıblar.
Sonra tədbir iştirakçıları Lerik Rayon Mədəniyyət Mərkəzinin foyesində rayon məktəblilərinin Xocalı faciəsinə həsr etdikləri əl işlərindən ibarət sərgiyə və Vətən müharibəsi şəhidlərinin xatirə lövhəsinə baxıblar.
Anım tədbirində Xocalı soyqırımı qurbanlarının və Vətən uğrunda canlarından keçən şəhidlərimizin xatirəsi bir dəqiqəlik sükutla yad edilib.
Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev çıxış edərək, erməni işğalçıları və havadarları tərəfindən törədilən bu misli görünməmiş faciə barədə danışıb. Qeyd olunub ki, 1992-ci il fevralın 25-dən 26-na keçən gecə Ermənistan silahlı qüvvələri beynəlxalq hüququn norma və prinsiplərini kobudcasına pozaraq keçmiş sovet ordusunun Xankəndidə yerləşən 366-cı alayının iştirakı ilə Xocalı şəhərinə hücum edib və dinc əhaliyə qəddarlıqla divan tutub.
Diqqətə çatdırılıb ki, 2020-ci il sentyabrın 27-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə erməni işğalçılarına qarşı həyata keçirilən əks-hücum əməliyyatı nəticəsində düşmən məhv edildi. Bununla da həm torpaqlarımız azad olundu, həm də Xocalı faciəsi qurbanlarının qisası alındı. Bu gün qəhrəman əsgər və zabitlərimiz Qarabağda dalğalanan müqəddəs bayrağımızı şərəflə qoruyurlar. Xocalı şəhidlərinin, Vətən uğrunda canından keçən bütün qəhrəman Azərbaycan övladlarının ruhu şaddır.
Lənkəran Regional Mədəniyyət İdarəsinin rəisi Şahin Şahbazov çıxışında qeyd edib ki, azərbaycanlılara qarşı qanlı cinayətlər törətmək Ermənistanın həyata keçirdiyi dövlət siyasətidir: “Ermənistanın bu təxribatlarına və hərbi təcavüzünə cavab olaraq, 2020-ci il sentyabrın 27-də Azərbaycan xalqı əzəli torpaqlarının işğaldan qurtarılması, BMT Təhlükəsizlik Şurasının qətnamələrinin tələblərinin yerinə yetirilməsi və tarixi ədalətin bərpa edilməsi uğrunda Vətən müharibəsinə qalxdı. 44 gün sürən döyüşlər nəticəsində Ali Baş Komandan İlham Əliyevin rəhbərliyi ilə rəşadətli Azərbaycan Ordusu parlaq Qələbə qazanaraq doğma torpaqlarımızı işğaldan azad etdi”.
Tədbirin bədii hissəsində Lənkəran şəhər Cəfər Cabbarlı adına 1 nömrəli Uşaq Musiqi Məktəbinin xor kollektivi çıxış edib.