Leysan çaylarda suyun səviyyəsini artırmışdır
Bakı, 25 avqust (AZƏRTAC). Avqustun 24-də Balakən-Şəki bölgəsində yağan leysan xarakterli yağışlar nəticəsində Qanıx çayında suyun səviyyəsi 86 santimetr artmış, o cümlədən Lənkəran-Astara bölgəsi çaylarında da sululuğun artması müşahidə olunmuşdur.
Ekologiya və Təbii Sərvətlər Nazirliyinin Milli Hidrometeorologiya Departamentindən AZƏRTAC-a bildirmişlər ki, hazırda Böyük Qafqazın Balakən-Şəki bölgəsi çaylarında sululuq ongünlük normanın 310, Quba-Xaçmazda 110-590, Lənkəran-Astarada 480-630, Kiçik Qafqazda 110-120, Naxçıvan MR çaylarında isə 63 faizini təşkil edir.
Eyni zamanda, güclü yağışlarla əlaqədar Kür çayının aşağı axınında da sululuğun artması qeydə alınmışdır. Belə ki, çayın Surra məntəqəsində suyun səviyyəsi 46, Şirvanda 44, Bankədə 24, Salyanda 47, Araz çayının Novruzlu məntəqəsində isə 14 santimetr qalxmışdır.
Buna baxmayaraq, Kür və Araz çaylarının bütün məntəqələrində suyun səviyyəsi ötən ilin müvafiq dövrü ilə müqayisədə aşağıdır.
Bölmənin digər xəbərləri
