Leysan yağışları Lənkəran-Lerik yolunda sürüşmələrə səbəb olmuşdur
Lerik, 8 avqust (AZƏRTAC). Cənub bölgəsinə yağan güclü yağışlar Lerik rayonunda bir sıra problemlər yaratmışdır.
AZƏRTAC xəbər verir ki, aramsız yağışlar zamanı dağlardan yola axan güclü sel suları Lənkəran-Lerik yolunun müxtəlif hissələrində sürüşmələrə səbəb olmuşdur.
Nəticədə yolda nəqliyyatın hərəkətində bir sıra problemlər yaranmışdır.
Lənkəran Regional Hidrometeorologiya Müəssisəsindən verilən məlumata görə, son iki gün ərzində Lerik rayonuna bir aylıq norma həcmində yağıntı düşmüşdür.
Rayonda ən çox yağıntı Lənkəran-Lerik yolunun keçdiyi Piran ərazisində qeydə alınmışdır.
Magistral yolun 20, 23, 27, 31 və 42-ci kilometrlərində uçqunlar baş vermiş, suötürücü boruların tutulması daşqınlara səbəb olmuş, yolboyu yerləşən turizm və istirahət mərkəzlərinə qismən ziyan dəymişdir.
Sürüşmənin baş verdiyi ərazilərdə 43 nömrəli Lerik yol istismarı idarəsinin bir neçə ağır texnikası və 25 nəfərdən ibarət canlı qüvvəsi selin yaratdığı fəsadların aradan qaldırılması işlərinə cəlb olunmuşdur.
Nəqliyyatın normal hərəkəti üçün sürüşmə zonaları bərkidilmiş, yol selin gətirdiyi daş parçaları, ağac qırıntılarından təmizlənmişdir.
Lerik rayon fövqəladə hallar komissiyasının sədri Habil Məlikov bildirmişdir ki, artıq Lənkəran-Lerik yolunda olan problemlər aradan qaldırılmış, avtomobillərin hərəkəti bərpa edilmişdir.
Bölmənin digər xəbərləri
