LİVANDA SÜLHMƏRAMLI QÜVVƏLƏRƏ İTALİYA BAŞÇILIQ EDƏCƏK
İtaliyanın Baş naziri ölkəsinin Livana nə qədər hərbçi göndərməyə hazır olduğunu açıqlamamışdır. Lakin “Cerusəlim Post” qəzetinin yazdığına görə, İtaliya məmurları onların sayının üç min nəfər olacağını söyləyirlər.
Prodi demişdir ki, İtaliya Yaxın Şərqin yaxınlığında yerləşir və buna görə də regionda baş verən hadisələr üçün məsuliyyət daşıyır.
Xatırladaq ki, BMT-nin sülhməramlı kontingentinə Fransa başçılıq etməyə hazırlaşırdı. Lakin Fransa hökuməti münaqişənin tənzimlənməsi üçün özünün cəmi 200 hərbçisini göndərməyi təklif etmişdir. Sülhməramlı qüvvələrin əsasını fransızların təşkil edəcəyinə ümid bəsləyən BMT və ABŞ təklif olunan kontingentin sayını komandanlığı Fransaya tapşırmaq üçün kifayət saymamışlar.
BMT-nin baş katibi Kofi Annan təşkilatın avropalı üzvləri öz qoşunlarını Livana göndərməyə tələsmədiklərinə görə onları tənqid etmişdir.
Bu ara Ehud Olmert bildirmişdir ki, İsrail ilə diplomatik münasibətləri olmayan ölkələrin nümayəndələrini cənubi Livanda görmək istəmir. O, üç müsəlman ölkəsini – İndoneziya, Malayziya və Banqladeşi nəzərdə tutur.
Bununla yanaşı, Livan Prezidenti Emil Lahud İsrail ilə hərbi əlaqələri olan dövlətlərin nümayəndələrinin sülhməramlı kontingentə buraxılmamasını tələb etmişdir.
Həmçinin bildirilmişdir ki, sülhməramlı qüvvələrin “Hizbullah”ın silahlı döyüşçülərinə atəş açmağa icazə verilmişdir. BMT nümayəndəsi demişdir ki, sülhməramlıların silahı yerə qoymaq tələbinə tabe olmayan adamlara atəş açmağa ixtiyarı var.
Bölmənin digər xəbərləri
