“LOKOMOTİV” İSM-İN GÜLƏŞÇİLƏRİ BEYNƏLXALQ TURNİRİN MÜKAFATLARINI QAZANMIŞLAR

03.04.2006 [12:37]
Çap et
A⁺ A^-

AZƏRTAC xəbər verir ki, Moskvada keçmiş SSRİ-nin əməkdar məşqçisi Viktor Şeynin xatirəsinə həsr olunmuş yunan-Roma güləşi üzrə beynəlxalq turnirə yekun vurulmuşdur.

1991-1992-ci il təvəllüdlü yeniyetmələr arasında keçirilən yarışmada Rusiyanın 8 vilayətinin, eləcə də Azərbaycan və Türkmənistan komandalarının 200-ə yaxın güləşçisi iştirak etmişdir. “Lokomotiv” İSM-in baş direktoru, məşqçi Mürsəl Qafarovun rəhbərlik etdiyi komandamızın 8 üzvündən 5-i vətənə medalla dönmüşdür.

İdmançılarımız, Fərhad Aydınlı (46 kq), Nurlan Rəsulov (76 kq) birinci, Kamal Məmmədov (50 kq), Fərid Ağaverdiyev (54 kq) ikinci, Zaur İslamzadə (76 kq) üçüncü yer tutmuşlar. Ümumi hesabda Moskva güləşçiləri 1-ci, Volqaqrad təmsilçiləri 2-ci, komandamız isə 3-cü olmuşdur.

Xatırladaq ki, yarışları idarə edənlər arasında respublika dərəcəli hakim Atil Hüseynov da var idi.