İDMAN
Lozannada Regional Rəqəmsal Kommunikasiya və Sosial Media Seminarı keçirilib
Bakı, 15 dekabr, AZƏRTAC
Azərbaycan Respublikası Milli Olimpiya Komitəsinin (MOK) təşəbbüsü, Milli Olimpiya Komitələri Assosiasiyası (MOKA) və Avropa Olimpiya Komitələrinin (AOK) birgə tərəfdaşlığı ilə İsveçrənin Lozanna şəhərində 3-cü Regional Rəqəmsal Kommunikasiya və Sosial Media Seminarı keçirilib. AZƏRTAC xəbər verir ki, Avropa, Asiya və Afrika qitəsindən olan 17 MOK nümayəndəsinin iştirak etdiyi seminarda Azərbaycan Milli Olimpiya Komitəsini beynəlxalq proqramlar idarəsinin rəhbəri Mehman Kərimov və DMS-Azərbaycan şirkətinin icraçı direktoru Tahir Tahirli təmsil edib.
Seminarın əsas məqsədi iştirakçı MOK-lara rəqəmsal kommunikasiya və sosial media sahəsində şəbəkələşmə və ən yaxşı təcrübələri paylaşmaq, eyni zamanda gənclərin “Qanqvon-2024” Qış Olimpiya Oyunları və “Paris-2024” Yay Olimpiya Oyunlarına hazırlıq imkanı yaratmaq olub.
Müvafiq sahədə ən son təcrübə və trendləri bölüşmək və oyunlardan əvvəl MOK-lara öz strategiyalarını təkmilləşdirmək üçün seminara ATOS, NEXT Sports və JTA kimi ixtisaslaşmış şirkətlər dəvət edilib.
Seminarın ilk günündə ANOC-un baş katibi Qunila Linberq və Milli Olimpiya Komitəsinin baş katibi Azər Əliyev tədbir iştirakçılarını onlayn formatda salamlayaraq, məqsəd və vəzifələrdən, həmçinin müvafiq sahədə MOK-ların üzərinə düşən öhdəliklərdən və bu sahədə gözləntilərdən danışıblar.
İki gün davam edən seminarda məzmun yaradıcılığı və məhsuldarlıq üçün AI (süni zəka) həlləri, məlumatların təhlili, Olimpiya Oyunlarının rəqəmsal çətinlikləri, Avropa Oyunları, Asiya Oyunları və Avropa Gənclər Olimpiya Festivalından ən yaxşı təcrübə və öyrənilmiş dərslər, o cümlədən idmançılara sosial mediada istifadə və sair mövzularda təqdimatlar olub.
Olimpiya Evində təşkil edilən son hissədə iştirakçılara sertifikatlar verilib.