Lüdviqshafen şəhərinin (AFR) tərəfdaşlıq əlaqələri bürosunun müdiri cənab Hans-Petr Demmer Almaniya Texniki Əməkdaşlıq Cəmiyyəti tərəfindən maliyyələşdirilən “Kiçikhəcmli tədbirlərə yardım göstərilməsinə dair layihələrə kömək” proqramı çərçivəsində Sumqayıtda olmuşdur.

Şəhər icra hakimiyyətindən AzərTac-ın müxbirinə bildirmişlər ki, iyun ayında, Almaniyanın Lüdviqshafen şəhəri ilə dostluq münasibətləri yaradılmasının 25 illiyi və tərəfdaşlıq əlaqələrinin 15 illiyi qeyd olunarkən “Tərəfdaş şəhərlərin - Sumqayıtın və Lüdviqshafenin AFR-in İqtisadi Əməkdaşlıq Məsələləri Nazirliyinin Almaniya Texniki Əməkdaşlıq Cəmiyyətinin layihəsində iştirakı haqqında” saziş imzalamışlar.

İndiyədək dörd kiçikhəcmli layihə işlənib hazırlanmışdır. Onlardan birincisi 1981-ci ildən Karl Buş adına gimnaziya ilə sıx əməkdaşlıq edən 15 nömrəli orta məktəbdə alman dili mərkəzi yaradılmasıdır. Sonrakı layihələr şəhər uşaq xəstəxanası üçün küvezlərin alınması və quraşdırılması, şəhər mərkəzindən uzaqda yerləşən 30 nömrəli orta məktəbin ərazisində müasir avadanlıqlar quraşdırılmış oyun meydançasının tikintisi və nəhayət, Mehdi Hüseynzadə adına stadionunun binasında əhaliyə pulsuz xidmət edəcək İnternet klubunun açılması ilə bağlıdır.

Sazişin şərtlərinə görə, bu layihələr Almaniya Texniki Əməkdaşlıq Cəmiyyətinin Bakı ofisi tərəfindən dekabr ayında həyata keçiriləcəkdir.

Almaniyalı qonaqın işgüzar səfəri zamanı beş irihəcmli layihə də müzakirə edilib qəbul olunmuşdur. Bu layihələr ətraf mühitin mühafizəsinə, ekoloji tərbiyəyə - ekoparkın yaradılmasına, habelə gənclərin asudə vaxtının təşkilinə dair konsepsiyanın işlənib hazırlanmasına, şəhərin su təchizatının və kanalizasiya şəbəkəsinin yaxşılaşdırılmasına və təkmilləşdirilməsinə aiddir.