MACARISTAN SOSİALİSTLƏRİ MİLYONÇUNU BAŞ NAZİR SEÇDİLƏR

26.08.2004 [12:27]
Çap et
A⁺ A^-

AZƏRTAC-ın xəbər verdiyi kimi, avqustun 25-də Macarıstanın Baş naziri Peter Meddyeşi hakim koalisiyanın sıralarında davam edən münaqişə ilə əlaqədar vəzifəsindən getmişdir. Bi-Bi-Si-nin yaydığı xəbərə görə, elə həmin gün ölkənin hakim Sosialist Partiyası yeni Baş nazir seçmişdir. Bu, 43 yaşlı biznesmen və keçmiş idman naziri Ferents Dyurçandır. O, Macarıstanın ən varlı adamı kimi məşhurdur.

Parlament üzvlərinin böyük əksəriyyəti – 453 deputat onun namizədliyinə səs vermişdir. Digər namizəd, hökumət dəftərxanasının naziri cəmi 166 səs toplamışdır. Səsvermənin nəticələri məlum olduqdan sonra Dyurçan bildirmişdir ki, onun məqsədi Macarıstanı çiçəklənən məmləkətə çevirməkdir. O, hökumətin əsas məqsədlərindən birini ölkənin 2010-cu ilədək avro zonasına daxil olmasında görür.

Yeni Baş nazir öz vəzifəsinə parlament onun namizədliyini sentyabrın 6-da təsdiq etdikdən sonra rəsmən başlayacaqdır.