Macarıstanın Yobbik Partiyası Xocalı soyqırımının 21-ci ildönümü ilə bağlı bəyanat yaymışdır
Budapeşt, 26 fevral (AZƏRTAC). Macarıstan parlamentində 46, Avropa Parlamentində 3 deputat mandatına sahib olan Yobbik - “Ən yaxşı Macarıstan uğrunda” siyasi partiya erməni hərbi birləşmələri tərəfindən 1992-ci il fevralın 26-da dinc azərbaycanlı əhaliyə qarşı Dağlıq Qarabağın Xocalı şəhərində törədilən soyqırımının 21-ci ildönümü ilə bağlı bəyanat yaymışdır.
Sənəddə Azərbaycan xalqı ilə həmrəyliyini ifadə edən partiya Ermənistanın regionda yürütdüyü işğalçılıq siyasətini qətiyyətlə pisləyir, BMT, ATƏT, Avropa Şurası və digər beynəlxalq qurumların münaqişənin ədalətli şəkildə tənzimlənməsi, Azərbaycanın suverenliyinin və ərazi bütünlüyünün bərpa olunması, qaçqın və məcburi köçkünlərin doğma yurdlarına qayıtması barəsindəki qətnamələrinin təxirə salınmadan həyata keçirilməsini tələb edir.
“Ən yaxşı Macarıstan uğrunda” partiyası 2011-ci ilin aprelində ölkə parlamentində ermənilərin Dağlıq Qarabağı işğalını pisləyən və Xocalı soyqırımının tanınmasını tələb edən qətnamə layihəsi ilə çıxış etmişdi.
Bəyanatın mətni partiyanın rəsmi http.www.jobbik.hu və http.www.alfahir.hu saytlarında yerləşdirilmiş, habelə parlamentin deputatları və mətbuat nümayəndələri arasında yayılmışdır.
AZƏRTAC həmin bəyanatın mətnini təqdim edir:
Bəyanat
Yobbik partiyası qardaş Azərbaycan xalqı ilə həmrəydir!
“Ən yaxşı Macarıstan uğrunda” partiyası erməni işğalçılarının Xocalı şəhərində dinc azərbaycanlı əhaliyə qarşı həyata keçirdikləri soyqırımının 21-ci ildönümü günündə kədərini və Azərbaycan xalqı ilə həmrəyliyini ifadə edir.
1992-ci il fevralın 26-da erməni və keçmiş sovet hərbi birləşmələri Dağlıq Qarabağa nəzarət uğrunda başlanmış işğalçı hərbi əməliyyatlar zamanı Azərbaycanın Xocalı şəhərini ələ keçirərək yerlə yeksan etmişlər. Şəhərin xilas olmaq istəyən sakinlərinə amansız divan tutulmuşdur. Nəticədə aralarında 106 qadın və 63 uşaq olan 613 dinc sakin öldürülmüşdür. 150 nəfərdən çox insanın taleyi indi də qaranlıq qalır.
1992-ci ildə başlanan erməni təcavüzü indiyə qədər 20 min azərbaycanlının həyatına son qoymuşdur. Erməni hərbi birləşmələri əsrlər boyu indiki Ermənistan ərazisində yaşayan 250 min nəfərdən çox azərbaycanlını öz doğma yurdlarından qovub çıxarmış, Dağlıq Qarabağda həyata keçirilən amansız etnik təmizləmə zamanı isə bu bölgənin özündən və ətraf rayonlardan daha 660 min nəfər azərbaycanlı əhali didərgin salınmışdır. Ermənistan bu gün də Azərbaycan ərazisinin təxminən beşdə birini işğal altında saxlayır. Dağlıq Qarabağ işğal olunmuş ərazilərin kiçik hissəsidir. Ətrafdakı işğala uğramış digər rayonlarda hər zaman Azərbaycan əhalisi üstünlük təşkil etmişdir.
Münaqişəni dinc yolla aradan qaldırmaq məqsədi ilə BMT, ATƏT, Avropa Parlamenti və digər beynəlxalq qurumlar indiyə qədər müxtəlif müraciət və qətnamələr qəbul etmişdir. Lakin Ermənistanın müqaviməti nəticəsində bu sənədlərdə irəli sürülən haqlı tələblərin həyata keçirilməsi mümkün olmamışdır. Azərbaycanın ərazi bütünlüyünün təmin edilməsi, erməni işğalının nəticələrinin aradan qaldırılması, qaçqınların yurdlarına qayıtması bu gün də beynəlxalq birlik qarşısında dayanan ciddi vəzifələrdən biri olaraq qalmaqdadır.
“Ən yaxşı Macarıstan uğrunda” partiyası Turan xalqlarının həmrəyliyi ruhunda çıxış edərək qardaş Azərbaycanın möhkəm sülhün təminatı kimi münaqişənin həlli, ölkənin suverenliyinin və ərazi bütövlüyünün təmin olunması yolundakı bütün səylərini dəstəkləyir.
25 fevral 2013-cü il
Budapeşt
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
