Mahmud Abdelsalam: Bakı Forumunda dünyanın üzləşdiyi çətinliklərin həlli yolları axtarılır
Bakı, 10 mart, AZƏRTAC
Dünyanın üzləşdiyi çətinliklərin həlli üçün X Qlobal Bakı Forumunda bir aradayıq. Burada bir çox problemlərin həllinə dair müzakirələr aparırıq.
AZƏRTAC xəbər verir ki, bu fikirləri X Qlobal Bakı Forumu çərçivəsində “Miqrasiya qlobal yoxsulluğun, bərabərsizliyin, iqlim böhranının və münaqişələrin simptomu kimi” mövzusunda keçirilən beşinci panel iclasında Müsəlman Ağsaqqallar Şurasının Baş katibi Muhəmməd Mahmud Abdelsalam söyləyib.
O bildirib ki, miqrasiya məsələlərində ərəb və Afrika ölkələrini də unutmamalıyıq. Bu, çox həssas mövzudur. Həmçinin Aralıq dənizi hövzəsində yerləşən ölkələr Cənubdan Avropaya köçmək istəyənlər üçün çox çətinləşib. Biz bu məsələni ciddi şəkildə nəzərə almalıyıq.
“Miqrantlar ölkələrindən iqtisadi böhran, iqlim dəyişikliyi və digər səbəblərdən köçürlər. Bəzi miqrantlar köçüb getdikləri ölkələrə iqtisadi baxımdan böyük töhfələr verirlər. Miqrantlar arasında çox savadlı olan şəxslər də var. Bəzi ölkələr də var ki, onlar qaçqınları qorumaq istəmir. Biz bu problem qarşısında bir olmalı, beynəlxalq həmrəylik üçün çalışmalıyıq”, - deyə baş katib vurğulayıb.
Bölmənin digər xəbərləri
