Makron Əlcəzair xalqının qarşısında diz çöküb üzr istəməlidir!
Bakı, 3 noyabr, Pərvanə Qarayeva, AZƏRTAC
Noyabrın 1-də Əlcəzairin paytaxtında Ərəb Dövlətləri Liqasının (ƏDL) 31-ci Zirvə toplantısı işə başlayıb.
AZƏRTAC-ın xəbər verdiyi kimi, tədbirin açılış mərasimində Azərbaycan Prezidenti İlham Əliyev fəxri qonaq qismində iştirak edib. BMT-nin Baş katibi, Afrika İttifaqının sədri və İslam Əməkdaşlıq Təşkilatının Baş katibi də tədbirə Azərbaycan dövlətinin başçısı ilə eyni statusda dəvət olunmuşdu.
Azərbaycan Prezidenti təxminən bir ay bundan əvvəl Praqada keçirilmiş “Avropa siyasi birliyi” Sammiti çərçivəsində “Avropa qitəsində sülh və təhlükəsizlik” mövzusunda dəyirmi masada, sonra isə Asiyada Qarşılıqlı Fəaliyyət və Etimad Tədbirləri üzrə Müşavirənin Astanada keçirilən 6-cı Sammitinin plenar iclasında iştirak edib. Bu dəfə isə Azərbaycanın səsi Ərəb Dövlətləri Liqasının Əlcəzairdə keçirilən Sammitinin yüksək tribunasından eşidildi.
Azərbaycan dövlətinin başçısının ən nüfuzlu beynəlxalq forumlara dəvət edilməsi nəyə dəlalət edir? Təbii ki, bu, ölkəmizin dünya arenasında qazandığı böyük nüfuzun və şəxsən dövlətimizin başçısına hörmətin göstəricisidir. Axı, dövlətimizin həm ikitərəfli, həm də çoxtərəfli əsasda qurduğu beynəlxalq əlaqələr seçilmiş və həyata keçirilən kursun səmərəli və uğurlu olmasını göstərən bir növ “lakmus kağızı”dır. Elə “izqoy ölkələr” var ki, abırlı adamlar onların liderləri ilə əl sıxıb görüşmək istəməzlər. Amma elə ölkələr də var ki, dünyanın aparıcı siyasətçiləri həmin ölkələrin liderləri ilə yanaşı əyləşməyi özləri üçün böyük şərəf sayırlar. Heç şübhəsiz, Prezident İlham Əliyev bu gün ən uğurlu lider nümunəsidir. O, həm Müzəffər Sərkərdə, həm inkişafın Azərbaycan modelinin memarı, həm jurnalistlərin dostu, alovlu natiq, siyasi qrosmeysterdir. Onun diplomatik istedadına Azərbaycanın bütün dostları heyran olduqlarını bildirir, daxilindəki zəhəri heç də həmişə gizlədə bilməyən düşmənlərimiz isə susaraq (bəzən də susmadan) qibtə edirlər. Buna görə də müxtəlif ölkələrə dəvətlər, həmçinin yüksəkvəzifəli xarici qonaqların Azərbaycana səfərləri dövlətimizin başçısının ölkəmizin beynəlxalq əlaqələrinin genişləndirilməsi sahəsində gərgin işinə əyani sübutdur.
Bu dəfə Əlcəzairin paytaxtında keçirilən Zirvə toplantısının yüksək tribunasından çıxış edən Prezident Azərbaycan xalqının səsini bütün dünyaya çatdırdı. Səfər çərçivəsində Prezident İlham Əliyev paytaxt Əlcəzairdə Şəhidlər Abidəsinin önünə əklil qoyub, bu ölkənin müstəqilliyi uğrunda Milli Mücahidlər Muzeyini ziyarət edib. Sosial şəbəkələrin istifadəçiləri bizim Prezidentin həmin muzeyi ziyarət edərkən Fəxri Qonaqlar Kitabında yazdığı mətnə heyran olduqlarını bildirirlər. Proqramın bu hissəsi bəlkə də ən emosional hissə idi, çünki muzeydə sərgilənən eksponatlar fransız müstəmləkəçilərin törətdiyi vəhşilikləri xatırladırdı. Prezident İlham Əliyev dərin məzmunlu çıxışında hər şeyi öz adı ilə adlandırdı. Qeyd edək ki, “insan haqları” üzrə xüsusi kursun bu özündənrazı “mühazirəçiləri” parlament seçkilərində ermənilərin səslərini qazanmaq üçün uydurma “soyqırımları”nın tanınması haqqında qətnamələr qəbul edərkən öz gözlərindəki tiri görmürlər.
Prezident İlham Əliyev öz çıxışında bu gün Qərbdə hökm sürən ikili standartlara diqqəti bir daha cəlb etdi. Fransanın Əlcəzairdə törətdiyi dəhşətli qətliamlara müharibə cinayətlərindən başqa ad vermək mümkün deyil! İndi öz Senatında Azərbaycana qarşı heç bir mənası olmayan qətnamə hazırlayan Fransa bizə “əxlaq” dərsi keçəcək? Bunun əvəzinə, Makron öz sələflərinin bütün cinayətkar əməllərinə görə Əlcəzair xalqı qarşısında təqsirkar olduğunu etiraf etməli, vaxtilə onun əcdadları tərəfindən kölə halına salınmış azadlıqsevər Əlcəzair xalqından üzr istəməlidir - İkinci Dünya müharibəsindən sonrakı dövrdə yenilənmiş Almaniya yəhudilərdən üzr istədiyi kimi! Makron diz çökməlidir - kansler Villi Brandtın etdiyi kimi. Lakin yeni müstəmləkəçilik siyasəti yürüdən Fransa bunun əvəzinə Cənubi Qafqaza soxulmaq üçün yollar axtarır. Nədən ötrü? Əlcəzairi qana boyadınız, indi də bizdə elə etmək istəyirsiniz? Burada sizə yer yoxdur, eşidirsinizmi? Necə deyərlər, “no entry, not welcome”!
Prezident İlham Əliyevin həm Azərbaycanın Lideri, həm də Qoşulmama Hərəkatının Sədri kimi Əlcəzairə səfəri dövlətimizin xarici siyasətinin zəfərinə sübutdur. Müstəmləkə xalqlarının öz azadlıqları uğrunda mübarizəsi nəticəsində özlərinin dənizarxası varidatlarını biabırçı şəkildə itirmiş sabiq müstəbidlər bu zəfər fonunda miskin və bədbəxt görünürlər.
Bir daha qeyd edək ki, Emmanuel Makron kimilər dünya siyasətinin korifeylərindən biri olan İlham Əliyev ilə bəhsləşə bilməzlər!
Bölmənin digər xəbərləri
