Maldiv Respublikasının naziri: İqlim dəyişikliklərinə qarşı davamlı şəhər konsolidasiyası modelini tətbiq edirik
Bakı, 17 oktyabr, AZƏRTAC
Maldiv Respublikası iqlim dəyişikliklərindən ən çox təsirlənən ölkələrdən biridir və bu reallıq ölkədə adaptasiya siyasətinin əsasını təşkil edir. Buna görə, ölkə iqlim dəyişikliyinə qarşı mübarizədə unikal yanaşmasını təqdim edib.
AZƏRTAC xəbər verir ki, bunu Maldiv Respublikasının tikinti və infrastruktur naziri Dr. Abdulla Muttalib “Səpələnmiş adalardan davamlı şəhərlərə: planlı şəhər konsolidasiyası vasitəsilə adaptasiyanın maliyyələşdirilməsi” mövzusunda tədbirdə çıxışı zamanı deyib.
Nazir bildirib ki, ölkəsi 1200 adadan ibarətdir, onlardan 187-si yaşayış üçün məskunlaşıb, 200-ə yaxın ada isə turizm məqsədilə inkişaf etdirilib.
“Ölkənin ümumi əhalisi 500 mindən bir qədər çoxdur. Adaların əksəriyyəti çox kiçikdir – 40 adada 500-dən az, 72 adada 1000-dən az, yalnız 5 adada 5000-dən çox əhali yaşayır. Üç ada isə əhalinin sayı 10 min nəfəri keçir. Bu qeyri-bərabər məskunlaşma paytaxt Maledə əhalinin sıx toplanmasına gətirib çıxarıb. Hazırda ölkə əhalisinin 41 faizi paytaxtda yaşayır. Daxili miqrasiya prosesləri sürətlə artır və bu, iqtisadi, sosial və infrastruktur baxımından böyük təzyiq yaradır”, – deyə o əlavə edib.
Dr. Abdulla Muttalib qeyd edib ki, iqlim dəyişikliklərinin təsirləri — dəniz səviyyəsinin qalxması, sahil erroziyası, duzlu suyun yeraltı sulara daxil olması və qeyri-sabit hava şəraiti — bir çox adaların mövcudluğunu təhlükə altına salır: “187 yaşayış adasının hər birində sahil mühafizəsi, infrastruktur və xidmətlərin təmin olunması iqtisadi və logistika baxımından uzunmüddətli dövrdə qeyri-dayanıqlıdır. Maldiv Respublikası reaktiv müdafiə yanaşmasından strateji planlaşdırma və şəhər konsolidasiyasına keçid edir. Biz resursları elə istiqamətləndiririk ki, insanlar təhlükəsiz şəraitdə yaşaya, xidmətlərə bərabər çıxış əldə edə və iqtisadi baxımdan dayanıqlı inkişaf edə bilsinlər. Bu məqsədlə ölkədə könüllü və mərhələli köçürmə siyasəti həyata keçirilir. Bu yanaşma ölkənin milli inkişaf planları və iqlim əsaslı strategiyaları ilə tam uzlaşır. Bizim məqsədimiz yalnız iqlim təsirlərindən qorunmaq deyil, həm də gələcək nəsillər üçün iqtisadi cəhətdən güclü, sosial baxımdan davamlı və dayanıqlı şəhər icmaları formalaşdırmaqdır”.
Bölmənin digər xəbərləri
