Mark Karni: Alberta əyalətinin Kanadadan ayrılması ilə bağlı referendum keçirilməsi faydasızdır
Bakı, 26 may, AZƏRTAC
Kanadanın Baş naziri Mark Karni Alberta əyalətinin ölkədən ayrılması ilə bağlı referendum keçirilməsini faydasız və qeyri-demokratik hesab edir.
AZƏRTAC xəbər verir ki, “The Globe and Mail” qəzeti Mark Karnidən iqtibas gətirib: “Albertanın Kanadadan ayrılması ilə bağlı fundamental sualları vermək faydalıdırmı? Əlbəttə ki, yox. Bu, Alberta xalqının demokratik iradəsidirmi? Onlar son əyalət seçkilərində buna səs veriblərmi? Xeyr, verməyiblər”.
Baş nazir əlavə edib ki, o, əyalətin Kanadanın bir hissəsi olaraq qalması üçün kampaniya aparmaq niyyətindədir.
Ötən həftə Alberta qubernatoru Daniel Smit oktyabrın 19-da əyalətin Kanadadan ayrılıb-ayrılmaması ilə bağlı səsvermənin keçiriləcəyini açıqlayıb.
Qeyd edək ki, Alberta 1905-ci ildə Kanadaya birləşib. 1940-cı illərdə bölgədə böyük neft ehtiyatları aşkarlanıb. Daha sonra regionda separatçı hərəkat başlayıb. Ölkənin sabiq Baş naziri Castin Trüdonun karbohidrogenlərdən imtina siyasəti neft sektorunda iş yerlərinin itirilməsinə və bir neçə böyük xarici şirkətin Albertadan geri çəkilməsinə səbəb olub. 2025-ci ildə Vaşinqton və Ottava arasında baş verən tarif müharibəsi Albertanın neft ixracına zərbə vurub və bu da bölgə sakinləri arasında narazılığı daha da artırıb.
Bölmənin digər xəbərləri
