MARTIN 7-DƏ ABŞ-AZƏRBAYCAN TİCARƏT PALATASININ 5-Cİ İLLİK KONFRANSI AÇILACAQDIR
Müstəqil Azərbaycanın keçdiyi yol, əldə etdiyi iqtisadi nailiyyətlər, ölkədə aparılan islahatlar, bazar iqtisadiyyatına keçid və gələcək inkişaf istiqamətləri ABŞ-Azərbaycan Ticarət Palatasının 5-ci illik konfransının diqqət mərkəzində olacaqdır. Xatırladaq ki, 4-cü konfrans 2000-ci ilin sentyabrında Prezident Heydər Əliyevin Vaşinqtona səfəri zamanı keçirilmişdi. Ötən ilin sentyabrına planlaşdırılan, lakin məlum terror aktları üzündən təxirə salınan 5-ci konfrans martın 7-də açılacaqdır. “Azərbaycan: müstəqillikdən on il sonra imkanlar və perspektivlər” mövzusunda konfransın təşkili ənənəvi olaraq palatanın üzvləri - Azərbaycanda fəaliyyət göstərən ABŞ şirkətləri tərəfindən maliyyələşdirilir. Konfransda işgüzar dairələrə Azərbaycandakı sabitlik, əlverişli sərmayə mühiti, qanunvericilikdə bununla bağlı ən son dəyişikliklər haqqında məlumat veriləcəkdir. ABŞ-Azərbaycan Ticarət Palatasının icraçı direktoru Seymur Xəlilov AZƏRTAC-ın müxbiri ilə söhbətində bildirmişdir ki, konfransda iştirak edəcəklərini təsdiqləyən nümayəndələr təkcə neft sektorunun təmsilçiləri deyildir. Qeyri-neft sektoru ilə iş quranlar, hər iki ölkənin hökumət və qeyri-hökumət strukturlarının nümayəndələri, beynəlxalq maliyyə qurumları, iqtisadi araşdırmalarla məşğul olan tədqiqat institutları, ali təhsil ocaqlarının təmsilçiləri, bir sözlə, Azərbaycanda maraqları olan hər bir təşkilat ölkədəki son dəyişikliklərdən və perspektivlərdən xəbərdar olmaq istəyir.
Konfransda ABŞ dövlət katibinin birinci müavini Riçard Armitac, senator Sem Braunbək, Harvard Universitetinin Xəzər tədqiqatları proqramının direktoru Qrehem Alison, Azərbaycanın Vaşinqtondakı səfiri Hafiz Paşayev, respublikamızın iqtisadi inkişaf naziri Fərhad Əliyev, ARDNŞ-in xarici sərmayələr idarəsinin rəisi Valeh Ələsgərov və b. çıxış edəcəklər.
Azərbaycanda bazar iqtisadiyyatına keçid dövründə qeyri-neft sektoruna baxış və ölkəmizin bugünkü iqtisadi göstəriciləri ayrıca iclasın mövzusu olacaqdır. Ötən konfransda olduğu kimi, bu dəfə də Azərbaycandakı işgüzar dairələrin fəaliyyətini əks etdirən sərgi təşkil olunacaqdır. Konfrans çərçivəsində ABŞ-Azərbaycan Ticarət Palatasının “İnvestment Qayt” (“Sərmayə bələdçisi”) bülleteninin növbəti nömrəsi buraxılacaqdır.
Martin 6-da palatanın Direktorlar şurasının iclasında boş yerlərə səsvermə keçiriləcəkdir. Xatırladaq ki, son zamanlar təşkilatın direktorlar və məsləhət şuralarında bir sıra dəyişikliklər baş vermişdir. Məsləhət şurasının üzvü Riçard Çeyni hazırda ABŞ-ın vitse-prezidenti olduğu üçün istefa vermişdir. Dövlət katibinin birinci müavini Riçard Armitaç da eyni səbəbdən Direktorlar şurasının üzvlüyündən çıxmışdır. Direktorlar şurasının həmsədri Riçard Matske “Şevrondan”dan getdiyinə görə palatadakı vəzifəsini icra etmir.
Amerika və Azərbaycan xalqları arasında qarşılıqlı anlaşmanı, dostluğu və işgüzar əlaqələri genişləndirmək məqsədi ilə yaradılmış ABŞ-Azərbaycan Ticarət Palatası bu il özünün 7 illiyini qeyd edir. Həyata keçirdiyi bir sıra humanitar, mədəni və akademik layihələrin siyahısına ötən il daha biri əlavə olunmuşdur. Həmin layihəyə əsasən, Bakının ali təhsil ocaqlarından seçilən iki tələbə 6 aylığa Vaşinqtona gəlir, palatanın işində yaxından iştirak edərək, idarəçiliyin əsasları sahəsində təcrübə toplayırlar. Bu layihədə iştirak etmək arzusunda olanlar daha ətraflı məlumatı ABŞ-Azərbaycan Ticarət Palatasının www. usacc. orq internet səhifəsindən və ya Amerika Beynəlxalq Təhsil Şurasının Bakı ofisindən ala bilərlər.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
