Masallıda din xadimləri ilə görüş keçirilib
Bakı, 13 aprel, AZƏRTAC
Azərbaycan İlahiyyat İnstitutunun (Aİİ) rektoru, dosent Aqil Şirinovun Masallıda din xadimləri ilə görüşü olub.
Əvvəlcə şəhidlərin əziz xatirəsi anılıb.
Bu barədə AZƏRTAC-a institutdan məlumat verilib.
Görüşdə Dini Qurumlarla İş üzrə Dövlət Komitəsinin (DQİDK) Masallı bölgəsi üzrə şöbəsinin müdiri Elvin Hüseynli qeyd edib ki, Azərbaycan Prezidenti İlham Əliyevin Sərəncamı ilə 2018-ci ildə Dini Qurumlarla İş üzrə Dövlət Komitəsinin nəzdində Azərbaycan İlahiyyat İnstitutu yaradılıb. Ali təhsil müəssisəsi ölkəmizdə tolerant və multikultural mühitin, milli-mənəvi dəyərlərimizin qorunması istiqamətində səylə çalışır.
Aİİ-nin rektoru Aqil Şirinov institutun fəaliyyəti barədə məlumat verib, müəssisədə təhsilin ödənişsiz olduğunu vurğulayıb. Rektor bildirib ki, institutun yaradılmasında əsas məqsəd Azərbaycan xalqının tarixi ənənələrinə söykənən və dövlət siyasətinin məntiqi nəticəsi olan yüksək dini-mənəvi mühitin qorunub saxlanılmasını və inkişaf etdirilməsini, dini fəaliyyətin təşkili sahəsində yüksəkixtisaslı kadrların hazırlanmasını təmin etməkdir.
İnstitut rəhbəri qeyd edib ki, cəmiyyətə təkcə savadlı din mütəxəssisləri və xadimləri deyil, eyni zamanda, Azərbaycanın milli dəyərlərini və ictimai strukturunu mənimsəmiş kadrlar lazımdır. Unutmaq olmaz ki, din müasir dünyada, təkcə mənəviyyat deyil, eyni zamanda, təhlükəsizlik məsələsidir.
Ölkəmizdə İlahiyyat İnstitutu kimi ali dini təhsil ocağının fəaliyyət göstərdiyini qeyd edən rektor deyib ki, gənclərimiz, artıq dərin dini və dünyəvi biliklərə yiyələnərək, din xadimi ola bilərlər və bunun üçün xaricə gedib dini təhsil almağa ehtiyac yoxdur. Rektor dinşünaslıq və islamşünaslıq ixtisasları üzrə tələbə qəbulu həyata keçirən ali təhsil müəssisəsində tələbələrə bütün dərsliklərin pulsuz paylandığını, onlara yemək pulu və adlı təqaüdlərin də verildiyini diqqətə çatdırıb.
Qafqaz Müsəlmanları İdarəsi Qazılar Şurasının üzvü Ağarəşid Talıbov din təhsilinin əhəmiyyətini vurğulayıb. O, dövlət-din münasibətlərindən, dövlətin dini ibadət ocaqlarına qayğısından bəhs edib.
Bölmənin digər xəbərləri
