MƏDƏNİYYƏT
Mədəniyyət və Turizm Nazirliyi QDİƏT-in turizm üzrə işçi qrupunun iclasında təmsil olunacaq
Bakı, 4 aprel, AZƏRTAC
Aprelin 7-8-də Türkiyənin İstanbul şəhərində keçiriləcək Qara Dəniz İqtisadi Əməkdaşlıq Təşkilatının (QDİƏT) turizm üzrə işçi qrupunun iclasında Mədəniyyət və Turizm Nazirliyinin turizm şöbəsinin müdiri Aydın İsmiyev iştirak edəcək.
Nazirlikdən AZƏRTAC-a bildirilib ki, iclas çərçivəsində QDİƏT-ə üzv ölkələrdə davamlı turizm sahəsində ən yaxşı təcrübələrin tətbiqi, təşkil edilən turizm tədbirləri və sərgilərində qarşılıqlı iştirak, turizmin xüsusi növləri üzrə əməkdaşlığın qurulması və bir sıra digər mühüm məsələlər müzakirə olunacaq.
İclasda cari ilin aprelin 23-də Moldovanın Kişinev şəhərində keçiriləcək nazirlərin görüşü üçün müzakirələr və hazırlıq işlərinin aparılması nəzərdə tutulub.
Qeyd edək ki, QDİƏT-in turizm üzrə işçi qrupunun iclasında turizm potensialı olan ölkələr Azərbaycan, Moldova, Yunanistan, Türkiyə, Ukrayna, Rusiya, Ruminiya təmsil olunacaq.