Mehriban Əliyevanın paylaşımı - Azərbaycan-Türkiyə qardaşlığının əbədiliyinin sübutu
Bakı, 11 fevral, AZƏRTAC
Uzun illər müxtəlif sınaqlardan üzüağ çıxan Azərbaycan-Türkiyə qardaşlığı dünyaya nümunədir. Bu qardaşlıq özünü xoş gündə də, dar gündə də göstərib. Son günlər, daha doğrusu, fevralın 6-da qardaş Türkiyədə baş verən dəhşətli zəlzələdən sonra dünya bir daha qardaşlığımızın sarsılmaz olduğuna şahidlik etdi.
Bunu Milli Məclisin deputatı Vüqar İskəndərov AZƏRTAC-a açıqlamasında söyləyib.
Qardaş ölkə Türkiyədə baş verən təbii fəlakətin Azərbaycanda da kədərlə qarşılandığını qeyd edən deputat deyib: “Mən zəlzələ zamanı həyatlarını itirənlərə Allahdan rəhmət diləyir, yararlıların isə tezliklə sağalmasını arzu edirəm. Eyni zamanda, bildirmək istəyirəm ki, bu hadisədən dərhal sonra qardaş ölkənin səsinə ilk səs verən məhz Azərbaycan oldu. O dəhşətli faciədən dərhal sonra, səhər saatlarında Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğana zəng vurdu. Telefon danışığında dövlətimizin başçısı İlham Əliyev Türkiyə Prezidentinə başsağlığı verib və bu ağır məqamda Azərbaycanın hər cür yardım göstərməyə hazır olduğumuzu bildirib. Eyni zamanda, Azərbaycan Prezidentinin tapşırığına əsasən baş vermiş faciənin nəticələrinin aradan qaldırılması ilə əlaqədar Türkiyəyə genişmiqyaslı yardıma başlanıb”.
V.İskəndərov bildirib ki, hər zaman öz xeyirxahlığı, dara düşənlərə göstərdiyi dəstəyi, humanizm prinsiplərinə sədaqəti ilə seçilən Azərbaycanın Birinci vitse-prezidenti Mehriban Əliyeva da bu prosesdə ön sırada yer alır. Təsadüfi deyil ki, zəlzələnin ilk saatlarından hadisə ilə əlaqədar paylaşım edən Azərbaycanın birinci xanımı Türkiyənin cənub-şərqində baş vermiş güclü zəlzələnin nəticələri barədə xəbərləri dərin kədər hissi ilə qarşıladığını bildirib, Allahdan faciə zamanı həlak olanlara rəhmət diləyib. Həlak olanların doğmalarına və yaxınlarına dərin hüznlə başsağlığı verən Mehriban xanım Əliyeva yaralananların və xəsarət alanların tezliklə şəfa tapmasını arzulayıb, Uca Tanrıdan bütün Türkiyə xalqına güc və səbir diləyib. Mehriban xanım Əliyeva, eyni zamanda, zəlzələdən zərər çəkənlərə yardım göndərilməsi üçün müvafiq tapşırıqlar verib. Artıq həmin yardımlar qardaş ölkəyə çatdırılıb.
Deputatın sözlərinə görə, Mehriban xanım Əliyevanın bu humanist addımları Azərbaycan-Türkiyə qardaşlığının Qazi Mustafa Kemal Atatürkün “Azərbaycanın sevinci bizim sevincimiz, kədəri bizim kədərimizdir” və Ulu Öndər Heydər Əliyevin “Bir millət, iki dövlət” fəlsəfəsinə əsaslandığını bir daha təsdiqlədi. Bütün dünya bir daha Mehriban Əliyevanın simasında yüksək mənəvi-əxlaqi dəyərlərə, milli təəssübkeşliyə malik, humanizm ideallarına sadiq Azərbaycan qadınının obrazını gördü. Zəlzələdən zərər çəkənlərə humanitar yardım olunması ilə bağlı paylaşım edən Mehriban xanım Əliyevanın müraciətində əks olunan fikirlər, həmçinin xalqımızın milli birlik və həmrəylik nümayiş etdirməsinə, insanlarımızın Türkiyə xalqının, bütün türk dünyasının yaşadığı bu faciəyə olan yanğısına, dəstəyinə Azərbaycanın birinci xanımının verdiyi yüksək dəyərin göstəricisidir. Bu, həm də Mehriban Əliyeva tərəfindən hazırda təbii fəlakət zonasında çalışan xilasedicilərimizin, tibb işçilərimizin, diplomatlarımızın, media nümayəndələrimizin əməyinə, o cümlədən yardım kampaniyasında iştirak edən hər bir vətəndaşımızın, yerli şirkət və təşkilatlarımızın, könüllülərin mövqeyinə, nəcib əməlinə verilən yüksək qiymətdir.
Həm Prezident İlham Əliyevin dəhşətli faciədən dərhal sonra səhər saatlarından Türkiyə dövlətinin başçısı Rəcəb Tayyib Ərdoğana telefon zəngi və Azərbaycan hökumətinin göstərdiyi yardımlar, həm birinci xanım Mehriban xanım Əliyevanın müvafiq paylaşımı və göstərişləri ilə Heydər Əliyev Fondu tərəfindən qardaş ölkəyə yardımların göndərilməsi, həm də 7-dən 77-yə Azərbaycan xalqının hər bir nümayəndəsinin bu məsələdə fəallıq göstərməsi Azərbaycan və Türkiyə arasında qardaşlıq, dostluq münasibətlərinin, qarşılıqlı sevginin sarsılmazlığı, möhkəmliyi və əbədiliyinin əyani sübutudur”, - deyə V.İskəndərov vurğulayıb.
Bölmənin digər xəbərləri
