MEK Ümummilli Lider Heydər Əliyevin anım günü ilə əlaqədar virtual sərgi hazırlayıb
Bakı, 12 dekabr, AZƏRTAC
AMEA-nın Mərkəzi Elmi Kitabxanası (MEK) Ümummilli Lider Heydər Əliyevin anım günü ilə əlaqədar virtual sərgi hazırlayıb.
MEK-dən AZƏRTAC-a bildirilib ki, virtual sərgidə dünyaşöhrətli siyasi xadim Heydər Əliyevin genişmiqyaslı fəaliyyətini əks etdirən nəşrlər təqdim olunub. Həmin nəşrlərin sırasında “Heydər Əliyev irsində tərbiyə və təhsil siyasətinin fəlsəfəsi millilik, ümumbəşərilik kontekstində (tarix və müasirlik)”, “Ədəbiyyatda Heydər Əliyev obrazı tarixi gerçəklikdən ideala”, “Aqrar islahatların Heydər Əliyev modeli”, “Heydər Əliyevin siyasi irsi və azərbaycançılıq”, “Heydər Əliyev və Çin”, habelə “Heydər Əliyev və Azərbaycanda yeni dövlət quruculuğu: 1993-2003” (türk dilində), “Heydər Əliyev və Azərbaycan dövlətçiliyində qadın məsələsi”, “Heydər Əliyev və milli-mənəvi dəyərlərimiz”, “Parlament tariximizin Heydər Əliyev dövrü”, “Heydər Əliyev və Azərbaycan dilinin inkişaf konsepsiyası”, “Heydər Əliyev siyasəti: tarix və müasirlik” və digər dəyərli nəşrlər yer alıb.
Nəşrlərdə müstəqil Azərbaycan dövlətinin memarı və qurucusu Ulu Öndər Heydər Əliyevin siyasi irsi, apardığı uğurlu islahatlar, eləcə də çoxcəhətli mədəniyyət nəzəriyyəsi təhlil olunur.
Geniş oxucu kütləsi üçün nəzərdə tutulan nəşrlərin elektron versiyalarını MEK-in elektron kataloquna daxil olub PDF şəklində yükləmək və ya onlayn formada mütaliə etmək mümkündür.
Qeyd edək ki, MEK-də virtual sərgi ilə yanaşı, ənənəvi sərgi də təşkil olunub.
Bölmənin digər xəbərləri
