MƏKTƏBƏQƏDƏR MÜƏSSİSƏLƏRDƏ UŞAQLARIN TƏLİM VƏ TƏRBİYƏSİ İLƏ13,5 MİN PEDAQOJİ İŞÇİ MƏŞĞUL OLUR
Bakı, 3 may (AZƏRTAC). Ölkədə təhsilə, o cümlədən məktəbəqədər təhsilə dövlət tərəfindən göstərilən diqqət və qayğı nəticəsində bu sahəyə dövlət büdcəsindən çəkilən xərclərin məbləği ilbəil artır.
Dövlət Statistika Komitəsindən verilən məlumata görə, bu ilin əvvəlinə ölkədə fəaliyyət göstərən 1607 dövlət və 5 qeyri-dövlət məktəbəqədər təhsil müəssisəsində 103,6 min uşaq təlim və tərbiyə almışdır. Məktəbəqədər təhsil müəssisələrinin 96 faizi Təhsil Nazirliyinin tabeliyindədir və onların 23 faizi Bakı şəhərində yerləşir.
Bu gün Azərbaycanda 1-5 yaşlarında olan uşaqların təhsilin ilk pilləsinə əhatə olunma əmsalı 15,8 faiz təşkil edir. Bununla belə, fəaliyyət göstərən məktəbəqədər müəssisələr tam gücü ilə işləmir və ölkə üzrə hər 100 yerə 81 uşaq düşür.
Məktəbəqədər təhsil müəssisələrinin 1094-ü körpələr evi- uşaq bağçası, 484-ü uşaq bağçası, 32-si körpələr evi və 2-si məktəb-uşaq bağçası kimi fəaliyyət göstərir. Müəssisələrin ümumi sayından 1602-si və ya 99,4 faizi ümumi təyinatlı, 10-u sanatoriya və xüsusi təyinatlıdır və hamısı şəhər yerlərində fəaliyyət göstərir.
Məktəbəqədər müəssisələrin 1002-si və yaxud 62 faizi altıgünlük, 610-u və ya 38 faizi beşgünlük iş rejimi ilə işləyir.
Bu müəssisələrə gələn uşaqların 93,2 faizi Azərbaycan, 6,5 faizi rus, 0,3 faizi isə gürcü dilində təlim və tərbiyə alırlar.
Məktəbəqədər təhsilin keyfiyyətinə təsir edən əsas amillərdən biri də onların pedaqoji kadrlarla təmin olunmasıdır. Cari ilin əvvəlinə həmin müəssisələrdə uşaqların təlim və tərbiyəsi ilə məşğul olmuş 13,5 min pedaqoji işçinin 10 min nəfərini və ya 74 faizini tərbiyəçilər təşkil etmişdir. Pedaqoji işçilərin hər dörd nəfərindən biri ali, 64 faizi orta ixtisas təhsilə malikdir. Ali təhsillilərin 82 və orta ixtisas təhsillilərin 78 faizinin pedaqoji təhsili vardır. Pedaqoji işçilərin 77 faizinin iş staji 10 ildən artıqdır.
Məktəbəqədər müəssisələrin 99,3 faizi kadrlarla tam təmin olunmuşdur və bir tərbiyəçiyə orta hesabla 10 uşaq düşür.
Ölkədə hər il məktəbəqədər müəssisələr üçün yeni binalar tikilir və son 5 ildə 6 min 749 yerlik 65 belə müəssisə istifadəyə verilmişdir.
Azərbaycanda məktəbəqədər təhsilin sürətlə inkişaf etdirilməsi və onun beynəlxalq standartlara tam uyğunlaşdırılması məqsədi ilə Azərbaycan Prezidentinin 2007-ci il 12 aprel tarixli Sərəncamı ilə “Azərbaycan Respublikasında məktəbəqədər təhsilin yeniləşdirilməsi Proqramı (2007-2010-cu illər)” təsdiq edilmiş və hazırda Proqramın yerinə yetirilməsi istiqamətində əməli tədbirlər həyata keçirilir.
Bölmənin digər xəbərləri
