“Mən - Dədə Qorqud: Epizod 1. Başlanğıc” tamaşası Meksikada göstərilib
Bakı, 17 oktyabr, Anara Axundova, AZƏRTAC
Azərbaycan Dövlət Yuğ Teatrının kollektivi “Kimera” 35-ci Beynəlxalq İncəsənət və Mədəniyyət Festivalında (The Quimera International Festival of Art and Culture) iştirak edib. Meksikanın Metepek şəhər bələdiyyəsi tərəfindən təşkil olunan bu tədbirə oktyabrın 10-da start verilib və 9 gün davam edəcək. Azərbaycandan gəlmiş teatr truppası rejissor Mikayıl Mikayılovun quruluş verdiyi “Mən - Dədə Qorqud: Epizod 1. Başlanğıc” tamaşasını böyük uğurla təqdim edib.
AZƏRTAC xəbər verir ki, məşhur “Kitabi-Dədə Qorqud” dastanının “Dirsə xan oğlu Buğaç” boyu əsasında hazırlanan bu tamaşa oktyabrın 16-da “Teatro Quimera”nın səhnəsində təqdim edilib. Qeyd etmək lazımdır ki, bu, əlyazmanın orijinalında – oğuz dialektində səhnələşdirilən yeganə tamaşadır.
Tədbirdə Azərbaycanın Meksikadakı səfirliyinin əməkdaşları da olublar. Səfir Məmməd Talıbov tamaşadan əvvəl çıxış edib.
Tamaşanın quruluşçu rejissoru Yuğ Teatrının baş rejissoru Mikayıl Mikayılov, quruluşçu rəssamı Azərbaycan Dövlət Milli Gənc Tamaşaçılar Teatrının baş rəssamı Mustafa Mustafayev, xoreoqrafı Azərbaycan Dövlət Akademik Opera və Balet Teatrının solisti, Əməkdar artist Anar Mikayılovdur. Musiqi tərtibatı İffət Əsgərova məxsusdur. Tamaşada (iki heyətdə) rolları teatrın aktyorları - Xalq artisti Vidadi Həsənov, Əməkdar artist Qasım Nağı, həmçinin Amid Qasımov, Mətanət Abbaslı, Nigar Mürsəlova, Vüqar Hacıyev ifa edirlər.
Yuğ Teatrının baş rejissoru Mikayıl Mikayılov AZƏRTAC-ın müxbirinə müsahibəsində bildirib ki, bu, Azərbaycanın “Kimera” Beynəlxalq İncəsənət
Yuğ Teatrının baş rejissoru Mikayıl Mikayılov AZƏRTAC-ın müxbirinə müsahibəsində bildirib ki, bu, Azərbaycanın “Kimera” Beynəlxalq İncəsənət və Mədəniyyət Festivalında ilk iştirakıdır. Üstəlik, ölkəmiz milli teatr tarixində ilk dəfədir ki, Meksikada təmsil olunur.
Yuğ Teatrı ölkəmizin incəsənətini təmsil etməkdən şərəf duyur. Bu, çox mühüm tarixi məqamdır. Teatrımızın poeziyası və üslubu Meksika mədəniyyətində dərin köklərə malikdir. Yuğ Teatrının formalaşma illərində biz digər vasitələrlə yanaşı, Meksika şaman ayinlərindən də istifadə edirdik və bu, bizim üçün ilham mənbəyi idi. İndi, ilk dəfə olaraq, böyük məsafə qət edərək buraya, okeanın o tayına gəlmişik. Bu, sözsüz ki, bütün kollektiv üçün həyəcanvericidir. Yeri gəlmişkən, bu mədəniyyət hadisəsi teatrımızın yaradıcısı Vaqif İbrahimoğlunun doğum gününə təsadüf etdi, 2025-ci il oktyabrın 18-də onun 76 yaşı tamam olacaqdı”.
Baş rejissorun sözlərinə görə, festivala hazırlıq gərgin şəraitdə keçib. Onlar səhnələri qurmalı və tamaşanı onun premyerası gözlənilən Azərbaycan Dövlət Gənc Tamaşaçılar Teatrının səhnəsinə uyğunlaşdırmalı idilər. Mikayıl Mikayılov izah edib ki, aktyorların Meksika festivalında tamaşanı oynadıqları səhnə təxminən Gənc Tamaşaçılar Teatrındakı səhnə ilə eynidir və bu, onların adaptasiyasını asanlaşdırır. Nəzərə alsaq ki, Azərbaycanın teatr kollektivinin tamaşaya hazırlaşması üçün cəmi bir gün yarım qalıb, bu, onun işini xeyli yüngülləşdirib.
“Meksikada olduğumuz müddətdə göstərdikləri köməyə və dəstəyə görə Azərbaycanın Meksikadakı səfirliyinin əməkdaşlarına və şəxsən səfir Məmməd Talıbova xüsusi təşəkkürümü bildirmək istəyirəm. Onların dəstəyi tamaşamızın və bütün səfərimizin uğurlu keçməsində böyük rol oynayıb”, - deyə rejissor bildirib
Həmsöhbətimiz “Mən - Dədə Qorqud: Epizod 1. Başlanğıc” tamaşasının beynəlxalq festivallarda nümayiş etdirilməsinin əhəmiyyətini də vurğulayıb.
O qeyd edib: “Bu, bizim mədəniyyətimizin, türk mədəniyyətinin özəyidir. Bu cür tamaşalar türk etnik qrupunun özünəməxsusluğunu əks etdirdiyi üçün müxtəlif ölkələrdə göstərilməlidir. Düşünürəm ki, bu, xarici tamaşaçıların böyük marağına səbəb ola bilər. Mədəniyyətimizi, ədəbiyyatımızı, mifologiyamızı təqdim etmək çox vacibdir”.
Hə il keçirilən “Kimera” 35-ci Beynəlxalq İncəsənət və Mədəniyyət Festivalı 1990-cı ildən təşkil edilir. Festivalda konsert proqramları, teatr tamaşaları, incəsənət, foto, kitab sərgiləri, milli mətbəxin təqdimatları nəzərdə tutulur. Meksikanın ən nüfuzlu tədbirlərindən biri hesab edilən festival bu il təxminən yarım milyon ziyarətçi cəlb edib.
Bölmənin digər xəbərləri
