Bakı, 9 aprel, AZƏRTAC

Mənzil İnşaatı Dövlət Agentliyinin (MİDA) fəaliyyətə başlamasının 8-ci ildönümü ilə əlaqədar qurumun inzibati binasında tədbir keçirilib.

AZƏRTAC xəbər verir ki, əvvəlcə MİDA-nın rəhbərliyi və kollektivi tərəfindən əlamətdar gün münasibətilə Fəxri xiyabanda Ümummilli Lider Heydər Əliyevin əziz xatirəsi ehtiramla yad olunub. Qurumun kollektivi, həmçinin Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş həmvətənlərimizin məzarlarını ziyarət ediblər.

İnzibati binada keçirilən tədbirdə çıxış edən Mənzil İnşaatı Dövlət Agentliyinin İdarə Heyətinin sədri Sadiq Sadıqov qurumun yaradılmasının 8-ci ildönümü, həmçinin 10 Aprel - İnşaatçılar Günü və Ramazan bayramı münasibətilə həmkarlarını təbrik edərək, ötən dövr ərzində görülən işlər və qarşıda duran vəzifələr barədə ətraflı məlumat verib. Qeyd edib ki, ölkədə aztəminatlı ailələrin güzəştli şərtlərlə mənzillərlə təmin edilməsi məsələsinə Prezident İlham Əliyev tərəfindən ayrılan xüsusi diqqətin daha bir göstəricisi 2016-cı il 11 aprel tarixli Fərmanı ilə Azərbaycan Respublikasının Mənzil İnşaatı Dövlət Agentliyinin yaradılması olub. Agentlik fəaliyyətə başladığı ilk gündən öz işini Prezident İlham Əliyevin tövsiyə və göstərişlərinə əsaslanaraq təşkil edib.

Bildirilib ki, əhalinin güzəştli şərtlərlə mənzillərə sahib olmasını təşkil etmək məqsədi ilə 8 illik fəaliyyəti dövründə Agentlik Bakıda və regionlarda 11 güzəştli mənzil layihəsinin icrasını həyata keçirib. Həmin layihələrdən 6-sının inşası tamamlanıb, 5 layihə isə hazırda reallaşdırılır. İcrası tamamlanmış layihələr - Yasamal Yaşayış Kompleksi, Yasamal Yaşayış Kompleksinin ikinci mərhələsi, Hövsan Yaşayış Kompleksi, Hövsan Yaşayış Kompleksinin ikinci mərhələsi, Sumqayıt şəhəri, Zəminə Həsənova küçəsində inşa edilmiş güzəştli mənzillər və Gəncə Yaşayış Kompleksidir. Həmin layihələrdə 11 mindən çox mənzil, 5 məktəb, 8 uşaq bağçası və 1 müasir tipli poliklinika tikilib.

Bu layihələrdə tikilmiş mənzillər (11 087 mənzil ) həm “Elektron hökumət” portalı üzərindən “Güzəştli mənzil” sistemi vasitəsilə satışa çıxarılıb, həmçinin dövlət sifarişi əsasında ayrılıb. Beləliklə, 8 il ərzində Agentliyin layihələrindən, ümumilikdə, 9444 ailə güzəştli mənzil əldə edib.

Vətəndaşlara güzəştli şərtlərlə təklif edilən bütün mənzillər tam təmirli olur, həmçinin mətbəx mebeli, kombi isitmə sistemi, su, qaz və elektrik sayğacları ilə təmin edilir. Mənzillərin satışı həm güzəştli ipoteka kreditindən istifadə etməklə, həm də öz vəsaiti hesabına ödəniş üsulu ilə reallaşır. Mənzillərin satışı prosesində güzəştli ipoteka kreditlərinin verilməsi “MİDA” MMC ilə əməkdaşlıq müqaviləsini bağlamış agent banklar vasitəsilə həyata keçirilir. Hazırda güzəştli ipoteka kreditlərinin verilməsi məqsədilə 12 agent bank ilə əməkdaşlıq edilir.

Hazırda icrası davam etdirilən layihələr isə Lənkəran Yaşayış Kompleksi, Sumqayıt Yaşayış Kompleksi, Binəqədi Yaşayış Kompleksi, Şirvan Yaşayış Kompleksi və Yevlax Yaşayış Kompleksidir. Bu layihələrdə, ümumilikdə 3692 mənzilin, 2 məktəb və 3 uşaq bağçasının tikilməsi nəzərdə tutulub.

MİDA tərəfindən ölkənin digər regionlarında da güzəştli mənzillərin tikintisi məqsədilə müvafiq torpaq sahələrinin müəyyənləşdirilməsi və əhalinin mənzil ehtiyacının öyrənilməsi istiqamətində araşdırma işləri mütəmadi olaraq aparılır və nəticələrinə uyğun olaraq torpaq sahələri seçilərək tikinti işləri həyata keçirilir.

Diqqətə çatdırılıb ki, işğaldan azad edilmiş ərazilərdə bu gün Prezident İlham Əliyevin tapşırığı ilə bərpa və quruculuq işləri sürətlə həyata keçirilir. Qarabağ tamamilə yenidən qurulur, ən müasir infrastruktur yaradılır, yeni yollar, hava limanları, elektrik stansiyaları tikilir, ağıllı kəndlər, qəsəbələr salınır. Qarabağda aparılan tikinti-quruculuq işləri Azərbaycan dövlətinin gücünün və potensialının göstəricisidir. Qarabağa “Böyük Qayıdış” çərçivəsində keçmiş məcburi köçkünlərin doğma yurdlarında daimi məskunlaşması üçün işğaldan azad edilmiş Füzuli və Cəbrayıl rayonlarında dövlətimizin başçısının tapşırıqlarına uyğun olaraq MİDA tərəfindən yaşayış kompleksləri inşa olunur. Ümumi sahəsi 8,9 hektar təşkil edən Füzuli Yaşayış Kompleksi 38 yaşayış binasından ibarətdir. Bu binalarda, ümumilikdə 846 mənzil var. Artıq Füzuli Yaşayış Kompleksində 666 ailənin, 2517 nəfərin daimi məskunlaşması təmin edilib. Cəbrayıl şəhərində tikilən Cəbrayıl Yaşayış Kompleksinin inşası da sürətlə aparılır. Ümumi sahəsi 7,87 hektar təşkil edir. Yaşayış kompleksi 33 yaşayış binasından ibarətdir. Bu binalarda, ümumilikdə 712 mənzil olacaq. Yaşayış kompleksinin inşasının bu ilin sonunadək yekunlaşdırılması nəzərdə tutulub. Bütün mənzillər tam təmirli, mətbəx mebeli və qaz plitəsi, su, qaz və elektrik sayğacları ilə təchiz olunmuş vəziyyətdə vətəndaşlara təhvil verilir. Yaşayış binaları ilə yanaşı, ərazidə sosial-məişət obyektləri, istirahət guşələri, yeraltı və yerüstü avtodayanacaqlar, uşaq oyun və idman meydançaları da istifadəyə verilir. Paralel olaraq hazırda Agentlik tərəfindən Xocalıda 3.34 hektar ərazidə 180 mənzildən ibarət 3 mərtəbəli 15 ədəd yaşayış binasının əsaslı təmiri və yenidən qurulması, həmçinin ərazinin abadlaşdırılması işi həyata keçirilir.

Bildirilib ki, Türkiyədə baş verən dəhşətli zəlzələdən sonra Prezident İlham Əliyevin tapşırığına əsasən, Azərbaycan hökuməti zəlzələnin baş verdiyi Kahramanmaraş vilayətində yeni məhəllə tikintisinə dəstək verib. Türkiyə hökumətinin dəstəyi ilə layihə ərazisi “Azərbaycan Məhəlləsi” adlandırılıb. Bu layihədə sakinlərin rahatlığının təmin edilməsi məqsədilə yaşayış binalarından əlavə ibtidai məktəbin, uşaq bağçasının və mədəniyyət mərkəzinin tikintisi nəzərdə tutulub. Hazırda 20 sinif otağından ibarət 1 ibtidai məktəbin, 3 sinif otağından ibarət 1 uşaq bağçasının və 16 yaşayış binasının tikinti işləri davam etdirilir. Digər tikinti obyektlərinin inşasına qısa zaman ərzində başlanılacaq.

Agentliyin fəaliyyəti ilə bağlı önəmli hadisələrdən biri də mənzilləri güzəştlə əldə etmək hüququna malik vətəndaşların müraciətlərinin real vaxt rejimində qeydiyyatının aparılmasını və mənzillərin güzəştli şərtlərlə satışını təmin edəcək şəffaf elektron sistemin yaradılması olub. Bu məqsədlə “Elektron hökumət” portalında “Güzəştli mənzil” sistemi yaradılıb və 2017-ci il mayın 30-dan müraciətlərin qeydiyyatına başlanılıb. Ötən müddət ərzində 36 mindən çox vətəndaşın mənzil əldə etmək hüququ təsdiqlənərək, həmin şəxslər üçün fərdi elektron kabinetlərin yaradılması təmin olunub. Elektron kabinetə sahib olmuş bütün vətəndaşlar qeydiyyat tarixindən və sıra nömrəsindən asılı olmayaraq, mənzillərin seçimində bərabər hüquqa malikdirlər. Eyni zamanda, 1, 3, 5 saylı Bakı, 1 saylı Sumqayıt və 1 saylı Gəncə regional “ASAN” xidmət mərkəzləri vasitəsilə vətəndaşların məlumatlandırılması davam etdirilməkdədir.

Agentlik tərəfindən inşa olunmuş çoxmənzilli yaşayış binalarının idarə edilməsi prosesinin operativ şəkildə həyata keçirilməsi, həmçinin vətəndaşların rahatlığının və vaxta qənaət baxımından məmnuniyyətinin təmin olunması məqsədilə Agentliyin tabeliyində “MİDA” MMC üçün daşınmaz əmlakın idarəetmə sistemi (o cümlədən “billinq” sistemi) yaradılıb və həmin sistemin Azərbaycan Respublikasının Mərkəzi Bankı tərəfindən yaradılmış Hökumət Ödəniş Portalına (HÖP) inteqrasiyası başa çatdırılıb. 2023-cü ilin aprel ayından istifadəyə verilmiş sistem vasitəsilə 8 mindən çox sakin üçün poçt məntəqələri, ödəniş terminalları, bank filialları, bankların mobil tətbiqləri, MİDA Kommunal veb-səhifəsi kimi ödəniş kanalları vasitəsilə rahat ödəniş imkanı yaradılıb.

Tədbirdə hesabat məruzələri ilə çıxış edən Agentliyin digər vəzifəli şəxsləri də 8 il ərzində müvafiq sahələrdə görülmüş işlər, qarşıda duran vəzifələr barədə ətraflı məlumat veriblər.

Sonda əmək fəaliyyətində fərqlənən bir qrup əməkdaş fəxri fərmanla təltif olunub.