Meşələrin bərpası və mühafizəsi gücləndirilir
Bakı, 14 iyul (AZƏRTAC). Ekologiya və Təbii Sərvətlər Nazirliyi (ETSN) Meşələrin İnkişafı Departamentinin tabeli qurumları bu ilin 6 ayı ərzində 1335 hektar sahədə əkin və səpin işləri həyata keçirmişdir. Meşə əkinlərinin becərilməsi məqsədi ilə 15 min 893 hektar sahədə xidmət, 13 min 636 hektar sahədə suvarma işləri aparılmış, 14 min 284 kiloqram toxum tədarük edilmişdir.
ETSN-in mətbuat xidmətindən AZƏRTAC-a verilən məlumata görə, 49,34 hektar sahədə toxum səpilmiş, 1495 min ədəd toxmacar, 1089 min ədəd çilik basdırılmış, 1322 hektar ərazidə torpaq hazırlığı işləri aparılmışdır.
Eyni zamanda, 77 min 413 manat dəyərində 10 min 384 kubmetr həcmində qanunsuz qırıntı aktlaşdırılmış və qanuna müvafiq tədbirlər görülmüşdür.
Meşə mühafizəsi və bərpası müəssisələrində aparılmış yoxlamalar zamanı qanun pozuntusuna yol verdiklərinə görə 46 meşə mühafizəçisi işdən azad olunmuş, 200 nəfərə isə töhmət verilmişdir.
Bölmənin digər xəbərləri
