MƏŞHUR AZƏRBAYCAN YAZIÇISI TBİLİSİDƏ
AZƏRTAC-ın xüsusi müxbiri xəbər verir ki, məşhur Azərbaycan yazıçısı və kinorejissoru Rüstəm İbrahimbəyov “Saçukari” (Hədiyyə) festivalında iştirak etmək üçün Tbilisiyə gəlmişdir. R.İbrahimbəyov jurnalistlərə demişdir ki, Gürcüstan böyük teatr ənənəsinə malik olan ölkədir. Rusiya-Gürcüstan münasibətlərinə toxunan R.İbrahimbəyov, bu iki xalqın qədim mədəni, ictimai və siyasi münasibətləri, Qafqazda Rusiyanın Gürcüstanla, demək olar ki, hamıdan çox yaxın əlaqəsi olduğunu qeyd etmişdir. O demişdir: “Hazırda Rusiya ilə Gürcüstan arasında mövcud münasibətləri faciə sayıram. Xeyli vaxtdır ki, Rusiyada fəaliyyət göstərirəm. Bir az əvvəl orada mərkəz yaratmışam. Həmin mərkəzdə rus və azərbaycanlı dostlar bir-birilə görüşürlər. Bildiyiniz kimi, Rusiyada sabiq sovet ölkələrinin mədəniyyət və digər sahələrinin nümayəndələri yaşayıb-yaradırlar. Mərkəzi yaratmaqdan məqsəd rusiyalılarda azərbaycanlılar barədə sağlam fikir formalaşdırmaqdır. Rusiyada söz böyük qüvvəyə malikdir. Ola bilsin ki, bir neçə rus binanın yandığını görsün, ancaq kimsə kənardan “yanğındır”,- deyə qışqırmasa, buna əhəmiyyət verməsin. Əminəm ki, müdrik insanlar münasibətlərdəki gərginliyə son qoyacaqlar”.
