“Microsoft” macar dilini süni intellekt sistemlərinə inteqrasiya edəcək
Budapeşt, 24 iyun, AZƏRTAC
Microsoft 10 milyard macar sözündən istifadə edərək öz süni intellekt sistemlərini inkişaf etdirmək üçün öhdəliklər paketi ilə razılaşıb.
AZƏRTAC xəbər verir ki, bu barədə Macarıstanın MTI informasiya agentliyi bu ölkənin Rəqabət Qurumuna (GVH) istinadla məlumat yayıb.
GVH iki il əvvəl “Microsoft”un Avropa xidmət provayderi ilə bağlı araşdırmaya başlayıb. Məqsəd şirkətin süni intellektlə işləyən axtarış sistemi xidmətlərini macarlara təqdim edərkən istehlakçıların müdafiəsi qaydalarına əməl olunmasını müəyyən etmək idi. Qurumun araşdırması zamanı “Microsoft”un təcrübələrindəki dəyişikliklər və istehlakçıların qismən artan bilikləri səbəbindən nə qaydaların pozulması, nə də onlardan birinin olmaması aşkar edilib. Bununla belə, şirkət mürəkkəb öhdəliklər paketini qəbul edib.
“Microsoft” indi azı 10 milyard macar sözündən ibarət məlumat bazasını süni intellekt sistemlərinə inteqrasiya edəcək. Bu, məlumat bazasını digər sistemlər üçün əlçatan edəcək. Beləliklə, digər tərtibatçılar ondan süni intellekt sistemlərini macar dilində öyrətmək üçün istifadə edə bilərlər.
Macarıstan dövlət qulluqçuları, kiçik və orta sahibkarlar, istehlakçılar üçün də süni intellekt üzrə təlim kursları təşkil olunacaq.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
