Milli Azərbaycan Ədəbiyyatı Muzeyi və Kooperasiya Universiteti əməkdaşlığa başlayır
Bakı, 20 may, AZƏRTAC
Nizami Gəncəvi adına Milli Azərbaycan Ədəbiyyatı Muzeyi ilə Azərbaycan Kooperasiya Universiteti arasında birgə əməkdaşlıq haqqında anlaşma memorandumu imzalanıb.
Muzeydən AZƏRTAC-a bildirilib ki, məqsəd iki qurum arasında praktiki əlaqələri genişləndirmək, qarşılıqlı təcrübə mübadiləsi aparmaq, birgə proqramlar təşkil etmək və digər fəaliyyətləri həyata keçirməkdir.
Memorandumun “Əməkdaşlığın formaları” adlanan maddəsi universitetin tədris-innovasiya infrastrukturundan muzeyin müvafiq əməkdaşlarının faydalanması platformasını rəhbər tutur. Buradakı müddəalara görə, universitetdə fəaliyyət göstərən ixtiraçıların və ya peşəkar tədqiqatçıların təkliflərindən muzeyin fəaliyyətində istifadə olunması, universitetin “Muzey, arxiv işi və abidələrin qorunması” ixtisası üzrə bakalavriat və magistratura səviyyələrində təhsil alan tələbələrin müvafiq sahədə könüllü və təcrübə proqramlarında, seminar və təlimlərdə iştirakının dəstəklənməsi nəzərdətutulur. Sənəddə, həmçinin buraxılış və magistr dissertasiyası işlərinə rəhbərlik etmək üçün muzey nümayəndələrinin cəlb olunması, muzeyin rəhbər şəxsləri və mütəxəssisləri tərəfindən universitet tələbələri üçün ixtisaslarının müxtəlif istiqamətləri üzrə “ustad dərsləri” nin təşkil edilməsi və s. öz əksini tapır.
Bölmənin digər xəbərləri
