İQTİSADİYYAT
Milli Bankın Mətbuat Xidmətinin Məlumatı
Azərbaycan Respublikasında banklararası pul bazarının müxtəlif seqmentlərinin formalaşdırılmasına dair bir çox təşkilati işlər görülmüş, müvafiq normativ-metodoloji baza yaradılmışdır. O cümlədən, müxtəlif maliyyə vasitələri ilə hərracların aparılması üçün müvafiq texniki avadanlıq və proqram təminatı ilə təchiz edilmiş mütəşəkkil ticarət meydançaları yaradılmışdır. Onlar Bakı Banklararası Valyuta Birjası (BBVB) və Bakı Fond Birjasında (BFB) fəaliyyət göstərirlər. Bu birjalarda bağlanmış əqdlər üzrə hesablaşmalar klirinq hesabları vasitəsilə AZİPS sistemində aparılır və banklar bu sistemdən istifadə etdikləri üçün Milli Banka komission haqqı ödəyirlər.
Milli Bankın İdarə heyəti qısamüddətli maliyyə bazarlarının inkişafını daha da təşviq etmək məqsədi ilə, bankların müxbir hesablarından BBVB-nin və BFB-nin klirinq hesablarına köçürüləcək məbləğdən asılı olmayaraq, banklar tərəfindən cəmi 5 000 manat məbləğində komission haqqının ödənilməsi barədə qərar qəbul etmişdir. Bu qərar sentyabrın 1-dən etibarən Milli Bank tərəfindən tətbiq olunmağa başlanacaqdır. Xatırladaq ki, əvvəllər banklar hər bir əməliyyat üzrə 0,043 faiz (ən çoxu 215 000 manat) komission haqqı ödəyirdilər.
Komission haqqının əhəmiyyətli dərəcədə aşağı endirilməsi maliyyə bazarlarında aparılan əməliyyatların daha da canlanmasına xidmət edəcəkdir.